Qurylys alańdarynan shyǵatyn las kólikter: Senator problemanyń sheshimin usyndy
NUR-SULTAN. QazAqparat – Senator Andreı Lýkın qurylys alańdarynda iri júk kólikteriniń dóńgelekterin jýyp-tazalaýdy mindetteý máselesin kóterdi, dep habarlaıdy QazAqparat tilshisi.
«Qurylys alańdarynda aınalma joldardy qarastyrý jáne iri júk kólikteriniń dóńgelekterin jýyp-tazalaý sharalary qabyldanbaı jatyr. Ótken jyly tıisti jumystar atqarylǵan bolatyn. Osyndaı tártip buzýshylyqtar úshin 120-ǵa tarta qurylys kompanııasy jaýapkershilikke tartyldy. Onyń ishinde jartysynda atalǵan faktiler qaıtalanyp otyr», - dedi A. Lýkın elordadaǵy Polıtsııa departamentiniń ujymymen kezdesý barysynda.
Osy oraıda ol qurylys salýshylar mundaı jaǵdaıda tek aıyppul tóleýmen shekteletinin atap ótti.
«Osyndaı jaǵdaılarǵa qurylysy qarqyndy júrip jatqan Esil aýdanynyń polıtseıleri jıi tap bolady. Sonymen qatar, Baıqońyr aýdany boıynsha jeke sektordyń úlesi basym. Sondyqtan olar da mundaı problemalardy sheshýi tıis», - dedi senator.
Bul turǵyda ol qurylys alańdaryn dóńgelekti jýatyn pýnktermen jasaqtaý, aınalma joldardy eskerý sharalaryn zańnamalyq túrde retteýdi usyndy. Eger de osy baǵyttaǵy jumystar iske asyrylmasa, onda qurylysqa ruqsat bermeý máselesi kóteriledi.
Foto: senate.parlam.kz
