Quryltaıda halyqtyń úni shyn máninde estilýi tıis – Memleket basshysy
«Quryltaıǵa Parlament depýtattary, saıası partııalar men Qazaqstan halqy Assambleıasynyń músheleri de shaqyryldy. Úkimettik emes jáne kásibı uıymdardyń ókilderi de shet qalǵan joq. Quryltaı quramyna óńirlik qoǵamdyq keńesterdiń múshelerin qostyq. Men Ulttyq quryltaı atyna zaty saı bolyp, el úmitin aqtaıdy dep senemin. Bizde túrli pikirtalas alańdary bar, biraq quryltaıdyń orny bir bólek. Quryltaı - keń aýqymdy jıyn. Biraq bul jumystyń sapasyna keri áser etpeýi kerek», - dedi Qasym-Jomart Toqaev.
Osy oraıda Prezıdent otyrystardy durys uıymdastyrý kerek ekenin qadap aıtty.
«Bul jerde halyqtyń úni shyn máninde estilýi tıis. Kez kelgen adamdy quryltaıǵa qatystyrýǵa bolmaıdy. Jurttyń muń-muqtajyn, talap-tilegin jetkizetin azamattar bas qosýy kerek. Bul el birligin nyǵaıtatyn, qoǵamdy uıystyratyn tyń ıdeıalar ortalyǵy bolatyna kámil senemin», - dedi Memleket basshysy.
Aıta keteıik, búgin Prezıdent jańadan qurylǵan Ulytaý oblysyna jumys saparymen kelgen bolatyn.
Keshe Memleket basshysynyń Ulttyq quryltaı qurý týraly Jarlyǵy jarııalandy .
Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partııa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar.