Quryq jaǵalaý aımaǵynda jańa baza ashyldy - Mańǵystaý

AQTAÝ. QazAqparat – Mańǵystaýda Táýelsizdik kúni qarsańynda Quryq jaǵalaý aımaǵynda «Abaı» manevrlik bazasy ashyldy, dep habarlaıdy QazAqparat tilshisi Qarakııa aýdany ákimdiginiń baspasóz qyzmetine silteme jasap.

Saltanatty sharaǵa Mańǵystaý oblysynyń ákimi Serikbaı Trumov qatysty. Aldymen eskertkish taqtany tabystaý men ashylý rásimi ótti. Keıin áskerı - teńiz týy kóterildi. Іs-sharada kemeler sherýi uıymdastyryldy.

Atalǵan manevrlik ornalasý pýnkti 800 tonnaǵa deıingi jıyntyq sý yǵystyrǵyshtyǵy bar, katerlerdi jáne kemelerdi arqandap baılaýǵa, turaqtandyrýǵa jáne olarǵa qyzmet kórsetýge, kemege elektr energııasyn óndirýge jáne berýge, tyldyq qamtamasyz etýge jáne Kaspıı teńiziniń ońtústik bóliginiń Memlekettik shekarasyn qorǵaý boıynsha kemeler jáne katerlerdiń tıimdi jumysyn qamtamasyz etý úshin tıeý-túsirý jumystaryn júrgizýge arnalǵan.

Aımaq basshysy Táýelsizdik kúni qarsańynda ashylǵan nysanmen quttyqtap, oǵan ultymyzdyń uly aqyny Abaıdyń esimi berilýi elge qýanysh, sarbazdarǵa aıbyn, urpaqqa ulaǵat bolaryn aıtty.

«Elimiz táýelsizdik alǵan jyldardan beri áskerı teńiz kúshteriniń áleýeti artyp, materıaldyq-tehnıkalyq bazasy da nyǵaıyp keledi. Ulttyq qaýipsizdik komıteti qaramaǵyndaǵy jaǵalaý kúzeti sońǵy jyldary birneshe ret jańa korablder men katerlermen tolyqqanyn bilesizder. Tolqyny týlaǵan teńizde qýatty qurylymdarmen qarýlanǵan sarbazdarymyz árqashan saýysqandaı saq, qyrandaı qyraǵy bolsyn!»-dedi oblys ákimi.