«Quryq» teńiz portynan ótýshilerge jalǵan PTR-test anyqtamasyn satqan feldsher ustaldy
Bul týraly Іshki ister mınıstrliginiń resmı ókili Nurdildá Oraz vedomstvonyń aqparat alańynda ótken onlaın brıfıngide aıtty.
«ІІM Tergeý departamentiniń áskerı-tergeý basqarmasy Mańǵystaý oblysynyń «Quryq» teńiz porty arqyly memlekettik shekarany kesip ótetin adamdarǵa PTR-testilerdi qoldan jasap, satýmen aınalysqan turǵyndardyń áreketin áshkereledi. Jedel-tergeý is-sharalary barysynda bir top adam, onyń ishinde osy teńiz portynyń feldsheri uzaq ýaqyt boıy PTR-testterdi qoldan jasap, qazaqstandyqtarǵa jáne shetel azamattaryna satyp otyrǵan», - dedi vedomstovnyń resmı ókili.
Onyń aıtýynsha, 21 jastaǵy port feldsheri Qazaqstan aýmaǵyna shyǵatyn jáne kiretin jolaýshylar úshin PTR-testilerdi qoldan jasap, sybaılastary arqyly satqan. Jalǵan testilerdiń baǵasy 3 000 teńgeden 10 000 teńgege deıin qubylyp otyrǵan.
«Turǵylyqty jeri boıynsha tergeý áreketterin júrgizý kezinde kúdiktiden satýǵa daıyn 48 jalǵan PTR-test, noýtbýk, prınter jáne tıisti qujattar daıyndaýǵa qajet basqa da tehnıkasy tárkilendi.
Atalǵan fakti boıynsha sotqa deıingi tergeý bastaldy. Onyń barysynda tergeý kúdiktilerdiń qylmystyq is-áreketiniń naqty aýqymy jáne memlekettik shekaradan zańsyz ótken adamdardyń sany anyqtalyp jatyr. Іshki ister mınıstrligi jalǵan qujat jasaǵany úshin 4 jylǵa deıin bas bostandyǵynan aıyrý túrindegi qylmystyq jaýapkershilik, al ony paıdalanǵany úshin 40 táýlikke deıin qamaýǵa alý kózdelgenin eske salady», - dedi Nurdildá Oraz.