Quryq portynda alǵashqy mıllıon tonna júk tasymaly tirkeldi
AQTAÝ. QazAqparat - Búgin Quryq portynyń temirjol paromdyq termınalynda operatsııalyq qyzmet bastalǵannan bergi alǵashqy mıllıon tonna júk tasymaly tirkeldi, dep habarlaıdy QR IDM baspasóz qyzmeti.
Port arqyly tıelgen júkterdiń negizgi tiziliminde munaı ónimderi, hımııalyq tyńaıtqyshtar, halyq tutynatyn taýarlar, metall ónimderi, mashınalar men jabdyqtar bar. 2017 jyldyń sońyna deıin termınal 1,2 mln. tonna júk tasymaldaıdy, al kelesi jyly bul kórsetkishti 2 mln. tonnaǵa deıin jetkizedi degen jospar bar.
Quryq portynyń temirjol parom termınaly «Nurly jol» memlekettik baǵdarlamasy aıasynda salynyp, ótken jyldyń sońynda iske qosylǵan bolatyn. Qazirgi ýaqytta Elbasynyń Qazaqstan halqyna Joldaýynda qoıǵan mindetteriniń aıasynda Quryq portynda qýaty 2 mln. tonna bolatyn avtomobıl paromdyq termınaly qurylysynyń ekinshi kezeńi júrip jatyr. 
Jobany iske asyrý Quryq portynyń Eýropa men Azııany jalǵaıtyn halyqaralyq kólik dálizindegi negizgi baılanystyrýshy bolýyna múmkindik beredi.
Aıta keteıik, «Qazaqstan temir joly» AQ marketıngtik zertteýine sáıkes 2020 jylǵa qaraı kútiletin qurǵaq jáne paromdyq júk aǵyny Qazaqstan teńiz porttarynyń baǵytynda 13,7 mln. tonnany quraıdy. Negizgi tranzıttik júk aǵyny konteınerlerde tasymaldanatyn Ońtústik-Shyǵys Azııadan, sonyń ishinde Qytaıdan shyqqan taýarlardan quralady. Ortasha eseppen jylyna 300 myń konteınerge deıingi tasymal oryndalady dep boljanýda.
