Quryq portynan Bakýge mıllıon tonna júk jóneltildi
Oǵan oblys ákimi Eraly Toǵjanov, «QTJ» UK» AQ basshylyǵy, Ázirbaıjan keme qatynasy kompanııasynyń ókili jáne Quryq portynyń eńbekkerleri jáne myńnan asa belsendi jas qatysty. Jıynda sóz alǵan Eraly Toǵjanov: «Byltyrǵy jyly Indýstrııalandyrý baǵdarlamasy aıasynda Elbasymyz ózi iske qosqan aılaqtan ótkiziletin júktiń kólemi búgin mıllıon tonnaǵa jetti. Bul kórsetkish aldaǵy jyldary eki esege ósetin bolady. Jyl saıyn júk aǵynynyń artýyna baılanysty Kaspıı óńiri aılaǵynyń áleýetin qarqyndy túrde damytýda. Búgingi port - keshegi Jibek jolynyń strategııalyq jalǵasy. Qazaqstannyń tranzıttik jáne eksporttyq áleýetin kóterip, kólik-logıstıkalyq jáne ındýstrııalyq ınfraqurylymyn alǵa jeteleıtin negizgi kúshke aınalmaq» - dedi. 
Saltanatty sharada Quryq portynyń bas dırektory M. Saqtaǵanov memleket basshysynyń tapsyrmasymen júzege asyrylyp jatqan Qazaqstannyń Kaspıı teńizindegi porttardy keńeıtý, elimizdiń kólik-logıstıkalyq áleýetin damytýdyń sharalaryna toqtaldy. Resmı málimetter boıynsha porttaǵy bir mıllıon tonna júktiń 548 myń tonnasy eksportqa shyǵaryldy. Importtyq júkter 452 myń tonnany qurap otyr. Taǵy bir tıimdi tusy atalmysh ınfraqurylymdar teńiz mańyndaǵy qozǵalysty tórt saǵatqa jedeldetedi. Máselen, Baký men Quryq arasyndaǵy parommen júrý ýaqyty 18 saǵatty quraıdy. Al, Aqtaýdan Bakýge 22 saǵat jiberedi.
Mańǵystaý jerinen jóneltilgen júk Ázerbaıjan, Grýzııa porttary arqyly Eýropaǵa qaraı jol tartady. Quryq parom keshenimen qazaqstandyq astyq, kómir, munaı ónimderi, tyńaıtqysh, hımııalyq ónimder, tranzıttik júkter, Qytaı, Qyrǵyzstan jáne Ózbekstannan shyqqan júkter eksportqa shyǵarylady. Parom kesheninde bir temirjol aılaǵy, tórt temirjol kórmelik parki bar. Temirjol stantsııasyna kire beriste óńdeý jáne suryptaý qyzmeti, «Ersaı stantsııasy - Quryq porty» kire beris temirjoly, ákimshilik jáne óndiristik maqsattaǵy nysandar salyndy. Atalmysh aılaqtaǵy parom ótkeli men «Borjaqty-Ersaı» temirjol jelisi basty jáne suıyq júkterdiń mýltımodaldyq tasymalyn qamtamasyz etedi. Bul óz kezeginde Kaspıı baǵdarymen batys baǵyttaǵy eksporttyq áleýeti men tranzıttik júk aǵynyn eselep arttyrady.
Eki temirjol aılaǵynyń paıdalanýǵa berilýi arqyly táýligine bes paromǵa qyzmet kórsetip, ol arqyly jylyna 4 mıllıon tonna júkti óńdeýden ótkizedi. Aılaqtaǵy avtokólik paromymen qyzmet kórsetýdi paıdalanýǵa berý jylyna 6 mıllıon tonnaǵa deıin júk ótkizýge múmkindik beredi.
