Quryq porty búkil óńirdiń tranzıttik áleýetin biriktiredi
«Búgin biz óte mańyzdy kólik-logıstıkalyq jobany iske qosqaly otyrmyz. Mýltımodaldyq hab Quryq portynyń ekinshi kezeńiniń qurylysy aıaqtalyp, shynyn aıtqanda, biz sonyń toıyna jınalyp otyrmyz. Bul bizdiń elimiz ǵana emes, sonymen qatar, búkil Eýrazııa úshin, ásirese, baýyrlas ári kórshi memleketter úshin mańyzdy. ıAǵnı, Ortalyq Azııadaǵy memleketterdiń barlyǵy teńizge shyǵatyn el deńgeıine jetti. Osy oraıda barshamyzdy búgingi saltanatty sátpen shyn júrekten quttyqtaımyn»,- dedi Memleket basshysy.
Sonymen qatar, Elbasy búgingi «Quryq» portyndaǵy sharanyń Kaspıı mańy memleketteri basshylarynyń sammıti qarsańynda ótip jatqany óte mańyzdy ekenin atap ótti.
«Jibek jolynda jańǵyrý ıdeıasyn júzege asyrý - geoekonomıkalyq turaqtylyqty nyǵaıtýdyń kepili bolady. Qazaqstan Eýropa men Azııa arasyndaǵy transkontınentaldyq tasymaldaýdy damytý jolynda aýqymdy jumystardy júzege asyrǵany jóninde sala mamandary baıandady. «Quryq» porty Túrkııa men Jerorta teńizi arqyly Eýropa elderine shyǵýǵa bizge múmkinshilik beredi. Bul búkil óńirdiń tranzıttik áleýetin arttyratyn jáne bárimizdi biriktiretin dáliz bolyp sanalady», - dedi Nursultan Nazarbaev. 
Aıta keteıik, Quryq porty Kaspıı teńiziniń shyǵys jaǵalaýynda ornalasqan. Aýa raıynyń qolaılylyǵyna baılanysty portta qysy-jazy toqtaýsyz avtokólik pen temirjol paromy jumys isteıdi. Kaspıı teńizi arqyly batys baǵdarda eksporttyq áleýetti kúsheıtý úshin parom qyzmetin qoldaný jaıy Memleket basshysynyń 2014 jylǵy 11 qarashadaǵy «Nurly jol -Bolashaqqa bastar jol» atty Joldaýynda aıtyldy. «Nurly jol» memlekettik baǵdarlamasynyń sınergııalyq jobasy Quryq portynda qosarlanǵan tehnologııalyq ıfraqurylymdy jasaqtaýǵa múmkindik berdi. Borjaqty-Ersaı temirjol jelisi salynyp, port aıdynyna tireldi. Qazirgi kezde Aqtaý men Quryq portyn jalǵaıtyn úshinshi tehnıkalyq kategorııadaǵy eki jolaqty joldyń qurylysy júrýde. Sonymen qatar, Atyraý- Astrahan joly salynyp jatyr. Bul eki joldy salýdaǵy maqsat - Ózbekstan, Reseı, Qytaımen júk jetkizý merzimin azaıtyp, taýar aınalymyn kúsheıtý. Bul el ekonomıkasyn damytýda jańa múmkindikterge jol ashady. Joba aıasynda Aqtaý portynyń soltústik jaǵalaýyn keńeıtý kezinde úsh termınaldyq nysan iske qosyldy. Bul óz kezeginde basty júkterdi ótkizý kólemin eki esege ósirdi
.
Esterińizde bolsa, Quryq portyndaǵy ótkizý kesheni nysandarynyń qurylysy 2015 jyly sáýirde bastaldy. 2016 jylǵy 6 jeltoqsanda Memleket basshysynyń qatysýymen ótkizilgen Jalpyulttyq telekópir kezinde porttyń alǵashqy ótkizý kesheni men temirjol joly iske qosyldy. «Quryq porty bizdi Kavkaz ben Eýropaǵa shyǵarady. Bul - bizdiń jańǵyrtýdy damytýdaǵy kópten kútken jobamyz»,-dep atap ótti N. Nazarbaev.
Al 2017 jylǵy 6 jeltoqsanda Jalpyulttyq telekópir kezinde Quryq portyndaǵy Avtokólik aılaǵy men avtomobıl paromyna arnalǵan gıdrotehnıkalyq ǵımarat testilik rejimde iske qosyldy.
2017 jyly 19 qazanda Quryq portynyń temirjol paromy termınaly alǵashqy mıllıon tonna júkti ótkizdi. 2017 jyly 1,5 mıllıon tonna júk ótkizilip, 320 keme portqa kirgen. 2017 jyly jeltoqsanda Quryq portynda «Ázerbaıjan Kaspıı teńiz keme kóligi» JAQ Ro-Ro tıpindegi «Bıastıakar Gara Garaev» kemesimen jeńil jáne júk avtokólikteri ótkizildi. Parom kesheni astyq, munaı ónimderi, tyńaıtqysh, hımııalyq zattar men basqa da júkterdi ótkize alady. 2018 jylǵy 7 aıda 1,2 mıllıon tonna júk ótkizilgen.
Port aýmaǵynda 4 aımaq bar: túsirý-tıeý kesheni operatsııalyq jumys orny, tehnologııalyq operatsııa óndiristik aımaǵy, jalpy porttyq nysandar aımaǵy jáne jolaýshylarmen jumys aımaǵy.
