Quryq porty arqyly 22 tonna temekini zańsyz ákelgen kontrabandashy sottaldy

NUR-SULTAN. QazAqparat - Ekonomıkalyq kontrabandamen aınalysqan sheteldik azamat ustaldy, dep habarlaıdy QazAqparat Qarjy monıtorıngi agenttigine silteme jasap.

Ekonomıkalyq kontrabanda - qashanda kez kelgen elge túzetilmeıtin zııan keltiredi jáne kóleńkeli ekonomıkanyń negizgi quramdas bóligi.

Máselen, Mańǵystaý oblysy boıynsha qarjylyq monıtorıng agenttiginiń aýmaqtyq departamentiniń qyzmetkerleri jalǵan qujattardy paıdalana otyryp, «jalǵan tranzıt» shemasy boıynsha Qazaqstan aýmaǵyna salmaǵy 22 tonna temekini zańsyz ákelgen sheteldik azamatqa qatysty sotqa deıingi tergeýdi aıaqtady.

Buǵan deıin ázirlengen qylmystyq jospar boıynsha qaskúnem Mańǵystaý oblysynyń «Quryq» teńiz portynan Jambyl oblysyna deıin Qazaqstan aýmaǵy arqyly «Ázerbaıjannan Aýǵanstanǵa» tranzıt dep ótirik aıtyp, temeki tıelgen júk kóligin aıdaǵan.

Alaıda ol Almaty oblysynyń aýmaǵynda zańsyz júk túsirý kezinde qylmys ústinde ustaldy.

Sot bas bostandyǵynan aıyrý jazasyn taǵaıyndady.

Paıdalanylǵan júk kóligi men zańsyz ákelingen temeki memleket kirisine alyndy.