Quryq pen Irannyń Amırabad porty arasynda alǵash ret parom jelisi iske qosyldy

AQTAÝ. QazAqparat – Mańǵystaýdaǵy Quryq porty arqyly Iranmen saýda-sattyqty nyǵaıtý maqsatynda alǵash ret «Quryq-Amırabad» parom jelisi iske qosyldy. Endi «Quryq-Amırabad» porttary arasynda túrli júk parom keshenimen tasymaldanady. Parom jelisi aıasynda Mańǵystaýǵa Irannan «Kompozıtor Rahmanınov» kemesi keldi, dep habarlaıdy QazAqparat.

«Kompozıtor Rahmanınov» - RO-RO tıptes keme. Atalǵan kemede ártúrli qural-jabdyqpen alty eýro júk kóligi keldi. Onyń bireýinde kıvı jemisi bar.

«Eń bastysy – parom arqyly kókónis pen jemis-jıdek tıelgen júk kólikterin tógilip-shashylýsyz (basqa kólikke aýystyryp júktemeı) tutynýshyǵa jetkizýge múmkindik bar. Bir paromda 32-ge deıingi refrıjeratorda (eýro júk kóligi) tez buzylatyn taýarlardy tasymaldaýǵa bolady. «Quryq-Amırabad/Enzelı» parom jelisi ırandyq jáne qazaqstandyq kásipkerler úshin de qyzyqty bolatynyna senimdimin», - deıdi Quryq portynyń marketıng jáne logıstıka boıynsha atqarýshy dırektor Álibek Ótegenov.

Quryq avtomobıldi ınfraqurylymy port arqyly tranzıt jáne eksporttyq-ımporttyq baǵyttaǵy júkti qabyldaý men jyldam qyzmet kórsetýge tolyǵymen daıyn.

Buǵan deıin Quryq porty Ázirbaıjanmen ǵana parom jelisin iske qosqan bolatyn.

2020 jyldyń 10 aıynda Quryq porty arqyly ótetin júk 1.352 mln tonnany qurady. Kórsetkish ótken jylmen salystyrǵanda 290 myń tonnaǵa nemese 21% joǵary.

Eksportqa munaı, astyq jáne halyqtyq qoldanystaǵy taýarlar jiberledi. Al ımport – zattyq ónimder men qurylys materıaldary sekildi halyqtyq qoldanystaǵy taýarlar.

Quryq porty Aqtaý qalasynyń ońtústiginde 100 shaqyrym qashyqtyqta ornalasqan. Porttyń qurylysy 2015 jyldyń sáýir aıynda bastalǵan. Porttyń temir jol paromdy termınaly 2016 jyldyń 6 jeltoqsanynda paıdalanýǵa berildi.

Quryq porty baǵdarlamasynyń jyldyq qýaty - 6 mln tonna.