Quryq parom porty -Transkaspıı dáliziniń mańyzdy bóligi
ASTANA. Qazaqparat - QR Premer-Mınıstriniń birinshi orynbasary Asqar Mamın Mańǵystaý oblysynyń ákimi Eraly Toǵjanovpen birge osy óńirge jumys sapary barysynda «Nurly jol» baǵdarlamasy jobalaryn iske asyrý barysyn tekserdi. Mamın Quryq parom portynyń ekinshi fazasy qurylysynyń nysandaryna bardy, dep habarlady «QazAqparat» HAA.
Keshenniń birinshi kezegi 2016 jyly jeltoqsanda iske qosylǵan. Temir joldy qosa alǵanda, 44 nysan paıdalanýǵa berildi. Bul júk vagondary tıelgen paromdardy táýlik boıy qabyldaýǵa múmkindik berdi.
2017 jyldan bastap port kommertsııalyq qyzmetti bastady, qazirde 93 keme qabyldanyp, 400 myń tonnadan astam júk túsirildi. Jyl aıaǵyna deıin bul kórsetkishti 1 mln tonnaǵa deıin jetkizý josparlanýda.
Memleket basshysynyń joldaýynda Quryq porty qurylysynyń ekinshi fazasyn iske asyrý qajettigi atap ótildi.
Quryq parom keshenin paıdalanýǵa berý Qazaqstannyń teńiz qaqpasyn keńeıtedi jáne Transkapıılik halyqaralyq kólik marshrýtynyń áleýetin arttyrady.
Sondaı-aq, A. Mamın oblystaǵy respýblıkalyq mańyzy bar joldardy qaıta jóndeý boıynsha jobalardyń iske asyrylýymen tanysty.
Qazirgi ýaqytta Mańǵystaý oblysynda uzyndyǵy 167 shaqyrym Aqtaý-Shetpe, uzyndyǵy 60 shaqyrym Shetpe-Saı Ótes sııaqty avtojoldar jobalary iske asyrylýda. Beıneý-Aqjigit-Ózbekstan shekarasyn qaıta jóndeý jumystaryn bastady.
Sonymen qatar osy jylǵy kúzden bastap qaryz týraly kelisimdi ratıfıkatsııalaǵannan keıin uzyndyǵy 73 shaqyrym Jetibaı-Jańaózen jolyn jóndeý bastalady.
A. Mamın osy jobalardy iske asyrý máselelerin qarady jáne óńirdiń kólik áleýetin arttyrý úshin qysqa merzimde avtomagıstraldardy jóndeýdi aıaqtaý sharalaryn qabyldaý tapsyryldy.
