Kúrshim aýdanyndaǵy taýly jerde shyqqan órttiń taralýy toqtatyldy – ShQO
ShQO Tótenshe jaǵdaılar departamenti baspasóz qyzmetiniń málimetine súıensek, Kúrshim aýdanynyń Quıǵan aýyldyq okrýgindegi taýly jerdi sharpyǵan órt 6 shilde kúni shyqqan.
«7 shildede «Qazáýeormanqorǵaý» mekemesiniń MI-2 tikushaǵy jaǵdaıdy baqylaý úshin oqıǵa ornyna ushyp shyqty. Áýeden barlaý nátıjesi boıynsha órttiń jalpy aýdany shamamen 20 gektarǵa jetetini anyqtaldy. Qazirgi ýaqytta órttiń taralýy toqtatyldy, jekelegen núktelerde sóndirý jumystary júrgizilýde», - delingen aqparatta.
Eldi mekenderge tónip turǵan qaýip joq. Jalyndy aýyzdyqtaýǵa Úlken Naryn jáne Kúrshim orman sharýashylyqtarynan, TJD órt sóndirý qyzmetinen jáne jergilikti atqarýshy organdardan 100-den astam adam men 15 tehnıka jumyldyrylǵan.
Eske salsaq, keshe Shyǵys Qazaqstan oblysynyń Kúrshim aýdanynda taýly jerde shóp órtenip jatqany habarlanǵan.