Kúrshim aýdanynda eki mekteptiń qurylysy júrip jatyr – ShQO
Bul týraly aýdan ákimi Almat Aqyshev «Memleket basshysynyń tapsyrmalary sheńberinde Kúrshim aýdanynyń áleýmettik-ekonomıkalyq damýy» taqyrybynda ótkizgen baspasóz konferentsııasynda málim etti.
«Aýdanda 3-ten 6 jasqa deıingi balalardy mektepke deıingi bilimmen qamtý kórsetkishi 100 paıyzdy qurap otyr. Al balabaqshalarda kezekte turǵan 3 jasqa deıingi búldirshinder sany – 200. Mektepterdi kompıýterlik tehnıkamen qamtýǵa da basa mán berilgen. Barlyq 41 mektepte kompıýterler bar. Búgingi tańda aýdan boıynsha bir kompıýterge 2 oqýshydan keledi. Urunhaıka aýylynda 100 oryndyq, Jolnusqaý aýylynda 50 oryndyq mektep qurylystary júrgizilýde», - dedi ol.
Ákimniń aıtýynsha, Jolnusqaý aýylyndaǵy bilim ordasy 15 qarashaǵa deıin, Urunhaıka aýylyndaǵy mektep 1 jeltoqsanǵa deıin salynyp bitedi.
Sondaı-aq óz sózinde ol Kúrshimdegi medıtsına salasynyń kórsetkishterine toqtalyp ótti.
«Aýdan halqyna medıtsınalyq kómekti 41 uıym kórsetedi. Jyl basynan beri ana ólimi men týberkýlezge shaldyǵý jaǵdaılary tirkelgen joq. Sheteldik jetekshi klınıkalarda medıtsınalyq kadrlardy oqytý maqsatyndaǵy óńirlik baǵdarlama sheńberinde aýdandaǵy bir dáriger Ulybrıtanııada bilim alyp kelgen», - dedi Almat Aqyshev.