Kúrshad Zorlý Qazaqstannyń jańa parlamenttik kezeńin tarıhı qadam dep baǵalady
ASTANA. KAZINFORM — Túrkııanyń bıliktegi Ádilet jáne damý partııasy (AK Parti) tóraǵasynyń orynbasary, Túrki memleketterimen baılanys jónindegi tóraǵasy Kúrshad Zorlý Qazaqstanda ótken Parlament saılaýyna oraı quttyqtaýyn jetkizdi. Ol saılaýdyń el jáne jalpy Túrki álemi úshin tarıhı mańyzyna toqtaldy, dep habarlaıdy Kazinform agenttiginiń Ankaradaǵy menshikti tilshisi.
Kúrshad Zorlý Qazaqstanda ótken Parlament saılaýyna baılanysty baýyrlas qazaq halqyn jáne búkil Túrki álemin quttyqtady.
Túrik saıasatkeri óz málimdemesinde daýys berýdiń aldyn ala beıresmı nátıjelerine toqtalyp, Quryltaıda ókildik etý quqyǵyna ıe bolǵan partııalardy quttyqtady.
Zorlýdyń aıtýynsha, saılaý qorytyndysy boıynsha qalyptasyp otyrǵan jańa kezeń Qazaqstan úshin ǵana emes, búkil Túrki álemi úshin de aıryqsha mańyzǵa ıe. Ol Qazaqstannyń zań shyǵarýshy organy kóptegen ǵasyrdan keıin alǵash ret túrki halyqtarynyń saıası dástúrinen bastaý alatyn tarıhı «Quryltaı» ataýymen jumysyn bastaıtynyna nazar aýdardy.
Kúrshad Zorlý Qazaqstannyń bir palataly parlamenttik júıege kóshýin de atap ótti. Sonymen qatar ol Qazaqstan men Túrkııa arasyndaǵy parlamentaralyq baılanystar men ózara is-qımyldyń odan ári damı beretinine senim bildirdi.
— Quryltaı túrki memleketteriniń saıası dástúrinde ádildik pen keńesýdiń, ózara pikir almasýdyń, sondaı-aq halqy erkin ekeniniń jarqyn nyshany, — dep atap ótti túrik saıasatkeri.
Zorlý bul tarıhı qadam Qazaqstannyń demokratııalyq damýyna jańa serpin berip, Túrki áleminiń ıntegratsııasyn nyǵaıtýǵa yqpal etetinine senim bildirdi.
Quttyqtaýyn qorytyndylaı kele, Kúrshad Zorlý Qazaqstanǵa odan ári tabys tilep, «Alǵa, Qazaqstan!» degen uran joldady.
Aıta keteıik, Quryltaı saılaýy qarsańynda Qazaqstannyń Ankaradaǵy elshiliginde jáne Ystanbul, Antalıa jáne Izmır qalalaryndaǵy Bas konsýldyqtarda saılaý ýchaskeleri quryldy.
