Kúrish naýqany: Qyzylordada 41 657 gektar egistikke sý berildi
ASTANA. KAZINFORM — Qyzylorda oblysynda kúrish alqaptaryn sýarý jumystary bastaldy. Qazirgi tańda 49 857 gektar jerge kúrish dáni sebilip, 41 657 gektar egistikke sý jiberildi. Bul týraly Sý resýrstary jáne ırrıgatsııa mınıstrligi málim etti.
Eske salsaq, bıylǵy vegetatsııa kezeńinde Qyzylorda oblysynda kúrish egisiniń kólemi 70 myń gektardan aspaýy tıis. Sýdy utymdy ári tıimdi paıdalaný maqsatynda Sý resýrstary jáne ırrıgatsııa mınıstrligi óńirge 3,2 mlrd tekshe metr kóleminde sý paıdalaný lımıtin bekitti. Belgilengen lımıtterdi eskere otyryp, oblystaǵy sharýa qojalyqtary egis qurylymyn ártaraptandyrý boıynsha jumys atqarylyp jatyr.
— Qazirgi ýaqytta sýarý sýyn bólý jumystary júrgizilip jatyr. Biz „Qazsýshar“ oblystyq fılıalymen turaqty baılanystamyz jáne sýdy bekitilgen kestege sáıkes alyp otyrmyz,— dedi «Mádi Qajy» JShS basshysy Jasulan Turlybekov.
Sala mamandarynyń aıtýynsha, sý jetkizý boıynsha kelisimsharttar jasalǵan.
— Sharýa qojalyqtaryna sý berý bekitilgen kestege sáıkes tolyq júzege asyrylyp jatyr. Búginde fılıalymyz dıqandarmen kanaldar arqyly sý jetkizý boıynsha 928 kelisimshart jasasty, — dedi «Qazsýshar» RMK Qyzylorda fılıalynyń dırektory Najmadın Shamuratov.
Aıta keteıik, Qyzylordada sý únemdeý arqyly kúrish ónimdiligi 30%-ǵa kóterildi.
