Kúrish ınstıtýty qyzmetin jetildirýge qomaqty qarjy bólinedi

ASTANA. KAZINFORM – Y.Jaqaev atyndaǵy Qazaq kúrish sharýashylyǵy ǵylymı-zertteý ınstıtýtyn jetildirýge respýblıkalyq bıýdjetten 4,1 mlrd teńge bólinedi. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- 2024-2026 jyldarǵa arnalǵan selektsııa jáne tuqym sharýashylyǵyn damytý jónindegi keshendi jospar aıasynda Y.Jaqaev atyndaǵy Qazaq kúrish sharýashylyǵy ǵylymı-zertteý ınstıtýtyn materıaldyq-tehnıkalyq bazasyn jańǵyrtý boıynsha memlekettik ınvestıtsııalyq joba ázirlengen. Atalǵan joba boıynsha 2024 jylǵy jeltoqsanda qarjylyq-ekonomıkalyq negizdemege oń qorytyndy alynǵan, - dedi Úkimet basshysy.

Onyń atap ótýinshe, joba bekitilgen kezde 2025-2027 jyldarǵa arnalǵan respýblıkalyq bıýdjet qabyldanyp qoıǵandyqtan. Sondyqtan tıisti shyǵystar kózdelmegen. Al bıyl bıýdjetke naqtylaý júrgizilgen joq.

- Qazirgi ýaqytta Parlament qaraýynda turǵan 2026-2028 jyldarǵa arnalǵan respýblıkalyq bıýdjet jobasynda «Ulttyq agrarlyq ǵylymı-bilim berý ortalyǵy» KeAQ enshiles uıymdarynyń materıaldyq-tehnıkalyq bazasyn jańǵyrtýǵa 16,8 mlrd teńge kózdelgen. Onyń ishinde 4,1 mlrd teńge ınstıtýttyń qyzmetin jetildirýge baǵyttalmaq, - dedi Oljas Bektenov.

Aıta keteıik, 2024-2026 jyldarǵa arnalǵan Baǵdarlamalyq-nysanaly qarjylandyrý aıasynda atalǵan ınstıtýt birqatar ǵylymı-tehnıkalyq baǵdarlamany, onyń ishinde selektsııa jáne tuqym sharýashylyǵy, kúrishtiń genetıkalyq qoryn zertteý, qant qyzylshasynyń tózimdiligi, sondaı-aq mal azyqtyq daqyldardy ósirý tehnologııalaryn ázirleý jobalaryn iske asyryp jatyr.