Kýrsanttyń óliminen keıin Almaty akademııasynyń bastyǵy qyzmetinen bosatyldy
NUR-SULTAN. QazAqparat – Kýrsanttyń óliminen keıin ІІM Almaty akademııasynyń bastyǵy qyzmetinen bosatyldy, dep habarlaıdy QR ІІM baspasóz qyzmeti.
Maqan Esbolatov atyndaǵy ІІM Almaty akademııasynyń kýrsanty Salamat Ótegenovtiń qaza tabýyna baılanysty Almaty qalasynyń Polıtsııa departamenti QR QK-niń 105-baby (óz-ózine qol jumsaýǵa jetkizý) boıynsha sotqa deıingi tergeý júrgizýde. Tergeý barysynda qaza tapqan adamnyń týystary baıandaǵan barlyq dálelder tekseriletin bolady.
Oqý ornyna Іshki ister mınıstrliginiń Kadr saıasaty jáne ózindik qaýipsizdik departamentteriniń basshylyǵy men jaýapty qyzmetkerlerinen arnaıy top jiberildi.
Tekserý qorytyndysy boıynsha ІІM-de tártiptik komıssııa ótti.
Ózine senip tapsyrylǵan bólimshede jumysty uıymdastyrýǵa tıisti baqylaý júrgizbegendikten Іshki ister mınıstriniń buıryǵymen Akademııa bastyǵy O. H. Smaıylov atqaryp otyrǵan laýazymynan bosatyldy.
Sondaı-aq, onyń ıdeologııalyq tárbıe jáne kadr jumysyna jetekshilik etetin orynbasaryn da qyzmetinen bosatý usynyldy.
Sonymen qatar, Akademııanyń taǵy 16 jaýapty qyzmetkeri qatań tártiptik jaýapkershilikke tartyldy, olardyń 5-eýi atqaryp otyrǵan laýazymdarynan bosatyldy.
Akademııanyń oqý protsesine, turmystyq jaǵdaılaryna, moraldyq-psıhologııalyq ahýalyna, qarjy-sharýashylyq qyzmetine keshendi tekserý taǵaıyndaldy. Oqý ornyna Mınıstrliktiń Іshki aýdıt, Kadr saıasaty jáne Ózindik qaýipsizdik departamentteriniń qyzmetkerleri jiberildi.
Mınıstr Erlan Turǵymbaevtyń tapsyrmasy boıynsha osyndaı tekserýler 2021 jyldyń 1 toqsanynda ІІM-niń barlyq oqý oryndarynda júrgiziledi.
