Kýrsantty ózine qol salýǵa ıtermelegen podpolkovnık sottaldy
ALMATY. QazAqparat - Kýrsantty ózine qol salýǵa ıtermelegen podpolkovnık Aıdar Qabdenovtiń isine núkte qoıyldy, dep habarlaıdy QazAqparat tilshisi áskerı sottyń baspasóz qyzmetine silteme jasap.
«Aıdar Qabdenov QR QK 451-babynyń 2-bóligimen aıypty dep tanylyp, 6 jylǵa bas bostandyǵynan aıyryldy. Sýdıa QR QK 63-babynyń 1-bólimimen jazany shartty etip belgileý týraly úkim shyǵardy», - dedi baspasóz qyzmetinen.
Sonymen qatar, QR QK 49-babynyń 1-2 bólimderi boıynsha Aıdar Qabdenovti «podpolkovnık» sheninen aıyrý týraly sheshim shyǵaryldy.
Aıta ketý kerek, ótken otyrysta jábirlenýshi kýrsant Baıtursyn Balabek sottalýshydan 6 mln teńge kóleminde moraldyq-materıaldyq shyǵyn talap etken bolatyn.
Onyń shaǵymyn sýdıa ishinara qanaǵattandyrdy. Aıdar Qabdenovten kýrsanttyń paıdasyna 300 000 teńge moraldyq shyǵyn óndirildi.
Aıta ketý kerek, desant fakýltetiniń 9-rota kýrsanty Baıtursyn Balabek emtıhan kezinde podpolkovnık Aıdar Qabdenov qasaqana nashar baǵa qoıǵany úshin ózine qol jumsaýǵa tyrysqan.
Іs materıaldaryna sáıkes, Aıdar Qabdenov kýrsanttan emtıhan alyp, baǵa qoıýǵa qaqysy bolmasa da óz laýazymyn asyra paıdalanǵan.
Jábirlenýshiniń aıtýynsha, muǵalimniń qyspaǵyna shydamaǵan ol dáris zalynan «asylyp qalamyn» dep shyǵyp ketken.
Ony estigen Qabdenov kezdesken kezde «áli tiri júrsiń be?» dep muqatqan kórinedi.
