Kýrsanttardyń ata-anasy Petropavlǵa gýmanıtarlyq kómek jiberip jatyr
PETROPAVL. KAZINFORM — Ulttyq ulan akademııasynyń 3 kýrs kýrsanty serjant Aldııar Orynbastyń Almaty oblysy Eńbekshiqazaq aýdany Taýtúrgen aýylynda turatyn ata-anasynan Petropavl qalasynyń sý tasqynynan zardap shekken turǵyndaryna gýmanıtarlyq kómek jetkizildi.
Bul kómek tek bir ǵana otbasynyń emes, Túrgen, Eńbek aýyldarynyń jáne basqa da eldi meken turǵyndarynyń atynan kelip otyr.
Qyzyljar óńirine jetkizilgen bul jolǵy gýmanıtarlyq kómekke tutas aýdan turǵyndary atsalysqan.
— Elimizde bolyp jatqan tabıǵı apatty kórip otyrǵan soń jaı qarap otyra almadyq. Túrgen aýyldyq okrýgynyń qaýymdastyq múshesi bolǵannan keıin aýyl azamattaryna úndeý tastap, tasqynnan qıyndyq kórip otyrǵan óńirlerge qoldaý bildirgimiz keldi. Jan-jaqtaǵy jaǵdaıdy baǵamdaı kele, azdy-kópti kómegimizdi Soltústik Qazaqstan oblysyna joldaýdy jón kórdik. Petropavl qalasynda ornalasqan Ulttyq ulan akademııasynda ulymyz Aldııar Orynbas bilim alyp jatyr. Áskerı salany tańdaǵan balamyz qazirgideı kezde oblys ortalyǵyna jaqyn jerdegi aýyl turǵyndaryna qarýlastarymen birge kómek qolyn sozyp júr. Sondyqtan biz de bul máselege beı-jaı qaramaı osy óńirge kómektesýge nıettendik, — dedi taýtúrgendik kýrsanttyń ákesi Bekzat Dúkenbaev.
Qarapaıym halyq jınap bergen qajetti zattaryń arasynda sýmen betpe-bet kelip, kúndiz-túni bóget soǵyp júrgen azamattar úshin ylǵal ótkizbeıtin arnaıy kıimder men qural-saımandar bar.
Sonymen qatar kómekke muqtaj turǵyndar úshin tósek-jabdyq, turmystyq ónimder, azyq-túlik sekildi ózge de mańyzdy zattar jınalǵan.
2 myń shaqyrym joldy artta qaldyrǵan júk kóligi Ulttyq ulan akademııasyna jaqyn jerge toqtady.
Qazirgi sátte kýrsanttar zattardy qabyldap alyp jatyr.
— Petropavl qalasynyń sý tasqynynan zardap shekken turǵyndaryna qoldaý bildirgeni úshin Eńbekshiqazaq aýdanynyń azamattaryna alǵys aıtamyz. Aýyzbirshilik tanytqan aýyl adamdarynyń bul áreketi qandaı qurmetke bolsa da laıyq. Demeýshilik bildirgen jandardyń arasynda bizdiń kýrsanttardyń ata-analarynyń bary da qýantady. Kelip jetken gýmanıtarlyq kómek jergilikti turǵyndarǵa jetkiziledi, — dedi Ulttyq ulan akademııasynyń 1 oqý batalonynyń komandıri polkovnık Raýan Ýsbanov.
Búginde oblys ortalyǵyna jaqyn jerdegi eldi mekenderde sýdyń deńgeıi tómendep kele jatyr.
Alaıda jergilikti turǵyndar sý tasqynynyń ekinshi tolqyny bolýy múmkin dep alańdaýly.
Soǵan qaramastan osyndaı qıyn kezde kómek qolyn sozǵan Almaty oblysynyń azamttaryna Petropavl qalasynyń irgesindegi Zarechnyı kentiniń turǵyndary dán rıza.
Sondaı-aq olar gýmanıtarlyq júkti tasýǵa kómek bergen Ulttyq ulan akademııasynyń basshylyǵy men kýrsanttaryna da alǵys aıtty.
