Kýrsanttar zamanaýı qaýipsizdik tehnologııalaryn ázirlep jatyr
ASTANA. KAZINFORM – Radıoelektronıka jáne baılanys áskerı-ınjenerlik ınstıtýtynda ǵylymı-zertteý qyzmeti aıasynda kýrsanttar avıatsııalyq qaýipsizdik, turaqty baılanys jáne qashyqtan basqarý salalaryndaǵy naqty mindetterdi modeldeıtin oqý-ınjenerlik prototıpter ázirlep jatyr.
Bul jobalar bolashaq ofıtserlerdi praktıkalyq daıarlaýdyń mańyzdy bóligi, munda teorııalyq bilim birden tájirıbe júzinde qoldanylady.
Osyndaı jobalardyń biri — aerodromdardaǵy ornıtologııalyq qaýip-qaterlerdi tómendetý tásilderin zertteýge arnalǵan bıoakýstıkalyq prototıp. Dybystyq jáne ýltradybystyq áserdi úılestire otyryp, kýrsanttar mundaı sheshimderdiń tıimdiligin, sondaı-aq qaýipsizdik turǵysynan eskerilýi tıis shekteýlerdi taldaıdy.
Taǵy bir baǵyt dala jaǵdaıynda turaqty baılanysty qamtamasyz etýge arnalǵan. Jedel habarlaý mobıldi qurylǵysy uıaly baılanys jelilerinsiz komandalardy jetkizý júıesin modeldeıdi jáne basqarý ıerarhııasyn, habarlamalardy krıptografııalyq qorǵaýdy, sondaı-aq avtonomdy qorek kózin qarastyrady. Bul ázirleme bolashaq ofıtserlerge tótenshe jaǵdaılar men radıokedergiler kezinde basqarý qaǵıdattaryn tájirıbe júzinde túsinýge múmkindik beredi.
Úshinshi baǵyt — Long Range tehnologııasyn qoldanatyn qashyqtan basqarý apparatýrasynyń jumys isteıtin oqý maketi. Ol radıotolqyndardyń taralýy men antennalarǵa qatysty pánderdi oqytý barysynda paıdalanylady jáne energııany eń az tutyný jaǵdaıynda alys qashyqtyqqa symsyz baılanystyń múmkindikterin kórneki túrde kórsetedi.
Jobalardyń ǵylymı jetekshisi, PhD doktory, arnaıy pánder kafedrasynyń oqytýshysy polkovnık Vladımır Arsenevtiń aıtýynsha, usynylǵan ázirlemeler bastapqyda oqý prototıpteri retinde qarastyrylady.
— Olardyń basty qundylyǵy — ázirleý úderisiniń ózinde: mindet qoıýdan bastap ınjenerlik esepteýlerge, baǵdarlamalaýǵa, synaqtan ótkizýge jáne nátıjelerdi taldaýǵa deıin. Sonymen qatar birqatar jobalar boıynsha jumys jalǵasyp, olar magıstrlik dıssertatsııalardyń negizine aınalýy jáne ǵylymı-zertteý qyzmeti aıasynda ári qaraı damýy múmkin, — dep atap ótti ol.
Osyndaı oqytý formaty kýrsanttarǵa oqý kezeńiniń ózinde-aq keıingi qyzmetine qajetti, baılanys, basqarý jáne qaýipsizdik salalaryndaǵy zamanaýı júıelermen jumys isteýge baǵyttalǵan praktıkalyq daǵdylardy meńgerýge múmkindik beredi. Bolashaq ofıtserler daıyn sheshimderdi paıdalanýmen ǵana shektelmeı, olardyń qalaı jasalatynyn jáne naqty jaǵdaılarǵa qalaı beıimdeýge bolatynyn tereń túsinýdi úırenedi.
Aıta ketelik Qazaqstanda joǵary oqý oryndaryndaǵy áskerı kafedralar tekserile bastaıdy.