Kýrsant ózin ólim haline jetkizgen ofıtserden 6 mln teńge talap etti
ALMATY. QazAqparat - Áskerı sottyń Almaty garnızonynda Áskerı ınstıtýttyń kýrsanty Baıtursyn Balabektiń isi jalǵasyp jatyr.
Sot barysynda jábirlenýshi Balabek podpolkovnık Aıdar Qabenovten moraldy materıaldy shyǵyn retinde 6 mln teńge talap etti, dep habarlaıdy QazAqparat tilshisi.
Sot tyńdalymy kezinde aıyptalýshy Aıdar Qabdenov kýrsant Balabektiń týa bitti júrek aqaýy bolsa da ınstıtýtta oqyp júrgenin aıtyp, aýrýy týraly anyqtamany qabyldaýdy surady.
«Men kýrsant Balabektiń naýqas fızıologııasy úshin jaýapty emes bolatynmyn. Balabektiń barlyq moraldyq qınalǵany, psıhologııalyq ahýaly, depressııada júrdim degeni aqylǵa kirmeıdi. Qalaısha onda ol naýqas bola tura áskerı ınstıtýtqa oqýǵa túsedi. Onyń psıhologııalyq jaǵdaıy keremet ekendigi júrgizilgen saraptamalarda anyqtaldy. Ol ózin ózi óltirýge tyryspaǵany kórinip tur. Bul jaǵdaıda shantaj ben aqsha basty bolyp tur», - dedi Qabdenov.
Qabdenovtyń qorǵaýshylary Balabektiń eshqandaı medıtsınalyq shyǵynǵa batpaı turyp 6 mln suraǵanyn zańǵa qaıshy ekenin dáleldeýge tyrysty.
Memlekettik aıyptaýshy Amangúl Jumanǵalıeva Baıtursyn Balabek moraldyq turǵydan zaqym alǵanyn aıtyp, ótinishti qabyldamaýdy aıtty.
Sonymen qatar, Aıdar Qabdenov kýrsantty jalǵan málimet bergeni úshin jaýapqa tartýdy ótindi.
Ol kerisinshe keltirgen moraldyq-materıaldyq shyǵynǵa óteý retinde 7,8 mln teńge talap etip, kýrsantqa qarsy aryz túsirmek.
Alaıda, sot onyń ótinishin qanaǵattandyrmady.
Aıta ketý kerek, desant fakýltetiniń 9-rota kýrsanty Baıtursyn Balabek emtıhan kezinde podpolkovnık Aıdar Qabdenov qasaqana nashar baǵa qoıǵany úshin ózine qol jumsaýǵa tyrysqan. Aıdar Qabdenovtiń kýrsanttan emtıhan alyp, baǵa qoıýǵa qaqysy bolmaǵan. Osylaısha oǵan qatysty óz ókilettiligin asyra paıdalanyp, kýrsantty ólimge ıtermelegen degen aıyp taǵyldy.
