Kýrsant ólimi: Aqtóbede eki áskerı qyzmetker sottaldy
AQTÓBE. KAZINFORM – Eki áskerı qyzmetshige Qylmystyq kodekstiń 453-baby 2-bóligimen aıypty dep tanyldy. Sot úkimimen sottalýshy Nurjan Aıdenov 4 jyl 6 aı, Zamanbek Tólegen 5 jylǵa bas bostandyǵynan aıyryldy. Al QR Qorǵanys mınıstrligi jábirlenýshi tarapqa 20 mln teńge tóleıdi.
Aqtóbe oblystyq áskerı sotynda búgin túske deıin sottalýshylar sońǵy sózin aıtty. Eki sottalýshy da ózine taǵylǵan aıypty moıyndamady.
– Parashıýtti jınaǵan adam men qoıma jetekshisi iste joq. Olardyń isine quqyqtyq baǵa berilmedi dep esepteımin. Daıyn emes parashıýtti qalaı beredi? Bul suraq ashyq kúıinde qalyp otyr, - dedi sottalýshy Nurjan Aıdenov.
Sottalýshy Zamanbek Tólegen de ózine taǵylǵan aıyppen kelispedi.
– Men ózimniń jáne otbasymnyń atynan taǵy da jábirlenýshilerge qaıǵyryp kóńil aıtamyn. Men bul jaǵdaıdy ózgertip, balańyzdy qaıtara almaımyn. Sot otyrysy kezinde qandaı da aýyrtpalyq týdyrsam, keshirim suraımyn. Biraq men bul jaǵdaıda negizgi sebepker emespin. 2025 jyldyń shilde aıynan bastap meniń de otbasym, ata-anam alańdap otyr. Sottan sot aldy tergeýi kezinde ketken qatelikterdi eskerýdi suraımyn. Kýrsant ólimi parashıýtti jınaǵan jáne ony bergen qyzmetkerdiń jumysyna degen salǵyrttyǵynan bolyp otyr. Men ózime taǵylǵan aıyppen kelispeımin, - dedi sottalýshy Zamanbek Tólegen.
Jaryssóz kezinde prokýror eki sottalýshyny da aıypty dep tanyp, 5 jylǵa bas bostandyǵynan aıyrýdy surady.
– Sottalýshy Nurjan Aıdenov Qylmystyq kodekstiń 453-baby 2-bóligimen aıypty dep tanylyp, 4 jyl 6 aıǵa, Zamanbek Tólegen aıypty dep tanylyp, 5 jylǵa bas bostandyǵynan aıyrý jazasy taǵaıyndalsyn. Sot zalynan qamaýǵa alynsyn. Jazasyn qaýipsizdigi tómen túzetý mekemesinde ótesin. Jábirlenýshilerdiń azamattyq talap aryzy ishinara qanaǵattandyrylyp, QR Qorǵanys mınıstrliginen 20 mln teńge óndirilsin, - dedi Aqtóbe oblystyq áskerı sotynyń sýdıasy Aıdana Mambetqazıeva.
Sýdıa úkimdi túsindirgen kezde kýrsanttyń birinshi ret parashıýtpen sekirgenin, eki laýazymdy tulǵanyń salǵyrttyǵynan bolashaǵynan zor úmit kúttirgen jas jigittiń qaza tapqanyn aıtty.
– Sot jábirlenýshilerdiń aýyr jaza taǵaıyndaý týraly pikirin eskerdi. Jábirlenýshiler keshirim bermedi, - dedi sýdıa.
Sot úkimine T. Bıgeldınov atyndaǵy áýe qorǵanysy kúshteri áskerı ınstıtýtynyń qyzmetkerleri qatysty. Olar sottalýshylardy qalaı alyp ketkenin kórdi.
Eske salsaq, byltyr shilde aıynda Aqtóbede parashıýtpen sekirý oqý-jattyǵýynda kýrsant kóz jumdy.
Kýrsant óliminen soń Qylmystyq kodekstiń 453-baby 2-bóligimen is qozǵalyp, eki kúdikti qamaýǵa alyndy. Onyń biri – ofıtser, ekinshisi – serjant.
Sot otyrysynda aıyptalýshylardyń qorǵaýshylary isti qaıta tergeýge jiberýdi surady.