Kýrs satatyn blogerlerge shekteý qoıylady — komıtet

ASTANA.KAZINFORM — Túrli kýrs satatyn blogerlerge shekteý qoıylady. Bul týraly SIM Tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov aıtty.

— Qazirgi qoldanystaǵy (Tutynýshynyń quqyǵyn qorǵaý týraly — red.) zań oqytý kýrstary qyzmetine taralmaıdy. Jańa zań oqytý kýrstaryna da júretin bolady, — dedi ol

«Tutynýshylardyń quqyqtaryn qorǵaý: bıznes, memleket jáne qoǵam dıalogy» atty forýmda.
Spıker zań normalary naqty qalaı jumys isteıtinin mysalmen túsindirdi.

— Endi naqty qandaı jaǵdaılardy retteıtinine kósheıik. Rasymen qazir azamattarymyz túrli tulǵalar usynatyn kýrstardy satyp alady. Blogerler dep te atap jatady, bir sózben aıtqanda olar ózderin naqty bir taqyrypty jete biletin adam sanaıdy. Olardyń tanystyrylymyn tyńdap otyrǵan kezde satyp alýshy ómiri bir sátte ózgerip, jarqyn kezeń bastalyp ketetindeı áserde bolady. Alaıda oqýdan soń shynaıy ómirinde ondaı ózgeris bolmaıdy. Osydan keıin olar shaǵymdanady. Sondyqtan zań jobasynda biz osy sekildi jaǵdaılardy eskerdik. Oǵan saı qyzmet kórsetýshige onyń qyzmetin satyp alýshyǵa sol kýrsty oqyǵan soń ómiri kúrt jaqsaryp ketetini jaıly ýáde berýine tyıym salynady. Bul shyn máninde tutynýshyny adastyrý, aldaý bolyp sanalady, — dep túıdi sózin Serik Qusaıynov.

Eske sala ketsek, elimizde 2023 jyldyń qyrkúıeginen beri Tutynýshylardyń quqyǵyn qorǵaý týraly jańa zań jobasy qaralyp jatyr. Qazir ol Májilistiń qaraýynda.

Jańa zań qabyldanǵan soń tutynýshy 4 satyly shaǵymdaný kezeńderinen ótpesten, birden sotqa júgine alatyn bolady. 

Tutynýshylar quqyǵyn qorǵaý ombýdsmeni ınstıtýty qurylady.

Elektrondyq saýda salasynda da ózgeris bolady.

Áýe tasymaly salasynda bılet qunyn qaıtaryp alý múmkindigin beretin norma da engizilýi múmkin.

Aqaýy bar jańa kólikti qaıtaryp berýge kedergi keltiretin norma joıylady.