Kýrorttyq aımaqtarǵa reıster jıiligi men sanyn arttyrý qajet – Ermek Marjyqpaev
ASTANA. KAZINFORM – Kýrorttyq aımaqtarǵa maýsymdyq ushaq reısteriniń jıiligi men sanyn arttyrý máselesin pysyqtaý qajet. Bul týraly búgin Úkimet otyrysynda Týrızm jáne sport mınıstri Ermek Marjyqpaev aıtty.
«Búgingi tańda 82 eldiń azamattary Qazaqstanǵa vızasyz kele alady. Halyqaralyq áýe qatynasy 108 baǵyt boıynsha 29 elge oryndalady. «Áýe erkindigi» 5-dárejesiniń arqasynda IndiGo, FlyNas, malaızııalyq AirAsia X sııaqty sheteldik avıakompanııalarynyń áýe kemeleri jıiligi men túrleri boıynsha shekteýsiz Qazaqstannyń birqatar áýejaıyna ushýdy oryndaý quqyǵyna ıe boldy», - dedi mınıstr.
Sonymen qatar ol Qazaq Air avıakompanııasy Samarqand-Túrkistan baǵytyndaǵy reısti iske qosqanyn aıtty.
«Jazǵy maýsym qarsańynda Qazaqstannyń kýrorttyq aımaqtaryna maýsymdyq reısterdiń jıiligi men sanyn arttyrý máselesin pysyqtaý qajet. Máselen, ótken jylǵy reısterdiń sany Alakól kólinde demalǵysy keletinderdiń aǵynyn qamtı almaǵanyn kórsetedi», - dedi Ermek Marjyqpaev.
