Kýrortty óńirlerdi damytýdyń 2026-2029 jyldarǵa arnalǵan Jol kartasy bekitildi
ASTANA. KAZINFORM — Týrızm jáne sport mınıstrligi 2026-2029 jyldarǵa arnalǵan kýrortty óńirlerdi damytýdyń Jol kartasyn iske asyryp jatyr. Qujat elimiz boıynsha zamanaýı ári qaýipsiz týrıstik keńistikter qalyptastyrýǵa baǵyttalǵan.
Almaty oblysy, Jetisý jáne Abaı óńirlerin qosa alǵanda, kýrortty óńirlerge júrgizilgen ınspektsııalyq sapar barysynda jaǵajaı aýmaqtarynyń qazirgi jaı-kúıine baǵalaý jasaldy. Nátıjesinde birqatar óńirde abattandyrý jumystary qolǵa alynyp, keıbir óńirde kýrorttardy zamanaýı standarttarǵa sáıkestendirý úshin qosymsha qoldaý qajet ekeni anyqtaldy.
— Jol kartasy 114 is-sharany qamtıdy. Ony iske asyrý jergilikti atqarýshy organdar men ortalyq memlekettik organdardyń birlesken jumysy arqyly júzege asyrylady. Jol kartasy aıasynda kýrortty óńirlerdiń kólik qoljetimdiligin arttyrý boıynsha sharalar qabyldanyp jatyr. Jazǵy maýsymda týrıstik baǵyttar boıynsha temirjol reısteriniń sany kóbeıtilip, qosymsha poıyzdar iske qosylady jáne vagondar sany arttyrylady, — delingen mınıstrlik taratqan aqparatta.
Sonymen qatar týrıstik óńirlerge, onyń ishinde sýbsıdııalanatyn baǵyttar boıynsha ishki áýe reısteriniń geografııasy keńeıtiledi. Bul týrısterdiń qozǵalysyn jeńildetip, kýrorttyq aımaqtardyń halyq úshin qoljetimdiligin arttyrýǵa múmkindik beredi.
Jol kartasyn iske asyrý kýrortty óńirlerdiń júıeli damýyn qamtamasyz etip, týrıstik ınfraqurylym sapasyn arttyrýǵa jáne Qazaqstanda ishki ári kelý týrızmin odan ári damytýǵa qolaıly jaǵdaı jasaýǵa múmkindik beredi.
Jol kartasynyń negizgi baǵyttary týraly tolyǵyraq aqparatty karýselden kóre alasyz.
Budan buryn Qazaqstan kýrorttaryna sheteldik týrısterdiń qyzyǵýshylyǵy artyp kele jatqanyn jazǵanbyz.
