Kýrort-Býrabaı temirjol vokzaly paıdalanýǵa berildi
ASTANA. KAZINFORM – Aqmola oblysynda jańǵyrtý jumystary aıaqtalǵannan keıin «Kýrort-Býrabaı» temirjol vokzalynyń saltanatty ashylý rásimi ótti. Bul týraly Kólik mınıstrligi habarlady.
Іs-sharaǵa Aqmola oblysy ákiminiń birinshi orynbasary Eldos Ramazanov jáne Qazaqstan Respýblıkasy Kólik mınıstrligi Temirjol jáne sý kóligi komıteti tóraǵasynyń orynbasary Eldos Nestaı qatysty.
Býrabaı – elimizdegi jetekshi týrıstik baǵyttardyń biri. «Kýrort-Býrabaı» temirjolvokzaly kýrorttyq aımaqtyń kólik qoljetimdiligin qamtamasyz etetin mańyzdy ınfraqurylymdyq nysan. Osyǵan baılanysty vokzal temirjol vokzaldaryn jańǵyrtý baǵdarlamasy aıasynda basymdyq berilgen týrıstik destınatsııalarda ornalasqan 20 vokzaldyń qataryna engizildi.
Jańǵyrtý jumystary barysynda ǵımarattyń qasbeti men ishki úı-jaılary tolyq jańartylyp, ınjenerlik jeliler aýystyryldy. Jolaýshylar úshin qolaıly kútý aımaqtary jasalyp, múmkindigi shekteýli azamattardyń erkin qozǵalysyna jaǵdaılar qamtamasyz etildi.
Atqarylǵan jumystar nátıjesinde jolaýshylarǵa qyzmet kórsetý sapasy, qaýipsizdik deńgeıi jáne vokzaldyń qoljetimdiligi aıtarlyqtaı artty. Vokzaldyń ashylýy Memleket basshysynyń tapsyrmasyna sáıkes júzege asyrylyp jatqan elimizdegi 124 temirjol vokzalyn jańǵyrtý jónindegi aýqymdy baǵdarlamanyń bir bóligi. Bul – Táýelsizdik jyldaryndaǵy temirjol vokzaly ınfraqurylymyn jańǵyrtýǵa baǵyttalǵan eń iri jobalardyń biri.
Aqmola oblysynda atalǵan baǵdarlama aıasynda 16 temirjol vokzaly jańǵyrtylyp jatyr. Sonyń biri – «Kýrort-Býrabaı» vokzaly. Jobanyń iske asyrylýy óńirdiń týrıstik áleýetin odan ári damytýǵa, jolaýshylarǵa kórsetiletin qyzmet sapasyn arttyrýǵa jáne Býrabaı kýrorttyq aımaǵynyń zamanaýı kólik ınfraqurylymyn qalyptastyrýǵa múmkindik beredi.
Aıta keteıik, BQO-da Oral temirjol vokzalyn jańǵyrtý jumystary 95% aıaqtaldy.
