Qurmetti mıssııanyń oıdaǵydaı ótkenine qýanyshtymyn - Alaý ustaǵan Almaty turǵynynyń pikiri
ALMATY. 13 qańtar. QazAqparat /Názıra Eleýhan/ - Elimiz boıynsha Alaý estafetasynda alaýdy 1020 adam qolyna almaq.
Sonyń ishinde Almatyda 80 adamnyń biri bolyp, alaýdy qolyna ustaý baqyty maǵan buıyrdy. Menińshe, Qazaqstannyń 20 jyldyq tarıhynda bul kez kelgen adamnyń peshenesine jaza bermeıtin múmkindik. Myńdaǵan adamdardyń ishinde meni tańdaǵandaryna baqytty sezindim. Qurmetti mıssııa oıdaǵydaı ótkenine qýanyshtymyn. Alaý estafetasyna qatysqan alaýger, Qazaq radıosynyń Aqparat-saraptama baǵdarlamalar redaktsııasynyń shef-redaktory Jylbek Senbekuly Kerimbek osylaısha óziniń sezimimen QazAqparat tilshisine bergen suhbatynda bólisti.
"Men 7-Qysqy Azııa oıyndarynyń alaýyn - Qazaq tiliniń mártebesi úshin alyp shyqtym. 40 gradýs aıazǵa shydaıtyn, nóserletip jaýǵan jańbyr men daýylǵa tótep beretin, aınalasyn qanatty alty barys qorshaǵan Alaýdy qolyma ustaǵanda ishimnen ulttyń rýhy sanalatyn Qazaq tili máńgi jasasyn dep tiledim. 7-Qysqy Azııa oıyndarynyń urany: «Maqsaty birdiń - rýhy bir» dep atalady. Demek, til máselesinde bárimizdiń maqsatymyz da, rýhymyz da, tilegimiz bir bolýy tıis. Biz keshegi keńestik zamanda tilinen túbegeıli aıyrylǵan túrki tildes qaraıym, qarashaı, qumyq, ǵaǵaýyz jáne taǵy da basqa halyqtardyń kebin kımeýimiz kerek. Sondyqtan, tilimizdiń mereıi árqashan ústem bolsyn dep tileımin!",-dedi ol.
Qazaq radıosynyń júrgizýshisi Jylbek Senbekulynyń pikirinshe, Qazaqstannyń kúshti sport derjavasy bolýyna barlyq múmkindikter bar. "Ásirese, qysqy sport túrlerin damytýǵa barlyq jaǵdaılar bar. Azııa oıyndarynyń ótkizilýine oraı salynǵan sporttyq nysandar elimizde buqaralyq sporttyń damýyna, sonymen qatar salaýatty ómir saltyn qalyptastyrýǵa yqpal etedi dep oılaımyn",- dep atap ótti ol.
