«Qurmet» ordeniniń ıegeri memlekettik nagradasynan aıyrylyp, 8,6 jylǵa sottaldy
ASTANA. KAZINFORM — Astanada jel elektr stantsııasyn salýǵa arnalǵan 8,5 mlrd teńgeniń urlaný deregine qatysty úkim shyǵaryldy, dep habarlaıdy Astana qalasynyń qylmystyq ister jónindegi aýdanaralyq soty.
2025 jylǵy 13 mamyrda Astana qalasynyń qylmystyq ister jónindegi aýdanaralyq soty alaıaqtyq, atap aıtqanda, adamdar tobynyń aldyn ala sóz baılasýy arqyly, aldaý jáne senimdi teris paıdalaný jolymen, iri jáne asa iri mólsherde jábirlenýshilerdiń aqshalaı qarajatyn birneshe ret urlady dep aıyptalǵan B.-ǵa jáne M.-ǵa qatysty úkim shyǵardy.
Sotpen B. jáne M. basqa adamdarmen birlesip, aldyn ala sóz baılasý arqyly áreket ete otyryp, 2020-2022 jyldar aralyǵynda «Ereımentaý qalasynda qýaty 50 MVt jel elektr stantsııasyn salý» jobasyn iske asyrýǵa arnalǵan «E» JShS — niń («Samuryq-Energo» aktsıonerlik qoǵamynyń enshiles kompanııasy) aqshalaı qarajatyn urlaǵany anyqtaldy. Urlyq jalǵan kelisimsharttarmen jáne affılırlengen kompanııalarǵa aqsha aýdarý arqyly jasalǵan. Shyǵyn mólsheri 8,5 mlrd teńgeden asady.
Sondaı-aq, 2021 jyldyń qazan aıynda B. «P» aktsıonerlik qoǵamymen transformatorlyq qosalqy stantsııalardy jetkizýge shart jasasqan, alaıda óz mindettemelerin oryndamaǵan. Saldarynan «P» aktsıonerlik qoǵamyna 157 mln teńgeden astam shyǵyn keltirilgen.
Sottalýshylardyń kinási jábirlenýshilerdiń, kýágerlerdiń aıǵaqtarymen, bank úzindilerimen, zattar men qujattardy tekserý hattamalarymen rastaldy. Prokýror bas bostandyǵynan aıyrý jazasyn taǵaıyndaýdy surady. Jábirlenýshiler olardy kináli dep tanýdy jáne talapty qanaǵattandyrýdy surady. Al sottalýshylar kináni moıyndamady jáne olardy aqtaýdy ótindi.
QK 190-baby 4-bóligi 2) tarmaǵynyń sanktsııasyna sáıkes múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan 10 jylǵa deıingi merzimge nemese onsyz, 5 jyldan 10 jylǵa deıingi merzimge bas bostandyǵynan aıyrý túrindegi jaza qarastyrylǵan.
— Sot úkim shyǵarǵan kezde B.-ǵa qatysty jeńildetetin jáne aýyrlatatyn mán-jaılardyń joqtyǵyn, M.-ǵa qatysty jeńildetetin jaǵdaı retinde eki jas balanyń bolýyn, ekeýinde de sottylyqtyń bolmaýyn eskerdi. Sot úkimimen B. — 8 jyl 6 aıǵa bas bostandyǵynan aıyrylyp, memlekettik nagradasy — «Qurmet» ordeni alyndy; QK-niń 55-baby 2-bóliginiń 2-tarmaǵyn qoldana otyryp, M.-ǵa 6 jyl 8 aı bas bostandyǵynan aıyrý túrindegi jaza taǵaıyndaldy. «E» JShS-niń azamattyq talap qoıýy ishinara qanaǵattandyrylyp, 8,5 mlrd jáne 3 mln teńgeden astam sot shyǵystary óndirildi. Talap qoıýdyń qalǵan bóligi qaraýsyz qaldyryldy, — dep habarlady Astana qalasynyń qylmystyq ister jónindegi aýdanaralyq soty.
Buǵan deıin úleskerlerden zańsyz 5,5 mlrd teńgeden astam qarajat tartqan kompanııa basshylary sottalǵanyn jazdyq.