Qurmash Mahan elorda áýejaıynda arýlardy merekesimen quttyqtady

NUR-SULTAN. QazAqparat – 8 naýryz merekesine oraı «Qazaqkontsert» memlekettik kontserttik uıymynyń ártisteri áıelder qaýymyn erekshe formatta quttyqtady, dep habarlaıdy QazAqparat tilshisi.

Nursultan Nazarbaev halyqaralyq áýejaıymen birlesip ótkizilgen is-shara aıasynda elorda turǵyndary men qonaqtary Qazaqkontsert solısi, belgili ánshi Qurmash Mahannyń ónerin tamashalaı aldy.

Ánshiniń oryndaýyndaǵy tanymal «Kezdesý men qoshtasý» jáne «Ańsarym» ánderi áýejaı jolaýshylaryn tánti etti. Buǵan qosa, Qurmash Mahan áýejaıdaǵy arýlar qaýymyna gúl tabystap, kóterińki kóńil-kúı syılady. Júrek tebirenter ánderdi birge shyrqap, tamasha merekelik kóriniske kýá bolǵan kórermender uıymdastyrýshylarǵa alǵys aıtty.

«Qazaqkontsert» uıymynyń baspasóz qyzmetiniń atap ótýinshe, Qazaqkontserttiń 60 jyldyǵy jáne Halyqaralyq áýejaıdyń 90 jyldyǵy syndy qos mereıtoı aıasynda eki uıym mýzykalyq ónerdi barsha halyqqa qoljetimdi etip, aldaǵy ýaqytta osyndaı áleýmettik-qoǵamdyq jobalardy birlesip usynbaq.