Qurmanǵazynyń 200 jyldyǵy: Oralda 1500 adam kúı tartady
ORAL. QazAqparat - Oralda Qurmanǵazynyń 200 jyldyǵyna oraı úsh birdeı iri shara josparlanyp otyr, dep habarlaıdy QazAqparat tilshisi.
Oblystyq mádenıet basqarmasy basshysynyń orynbasary Saıran Dúısenteginiń aıtýynsha, 19 qyrkúıek kúni saǵat 18.00-de Qazaqstannyń Tuńǵysh Prezıdenti alańynda 1500 adam «Naǵyz qazaq - dombyra» atty shara barysynda bir mezgilde Qurmanǵazynyń «Balbyraýyn» jáne «Adaı» kúılerin tartady.
Bulardyń 700-i oblys aýdandarynan, qalǵany qaladan jınalady. Oryndaýshylardyń arasynda oqýshylar, qarapaıym turǵyndar, túrli mamandyq ıeleri bolady. Barlyq eriktiler aldyn ala jazyla alady. Olar aldymen 18 qyrkúıek kúni alańǵa kelip, daıyndalady.
Ekinshi shara - «Uly dala murasy» atty respýblıkalyq dombyrashylar baıqaýy. 18 qyrkúıek kúni Jastar mádenıet úıinde ótetin kúı dodasyna qazirdiń ózinde jıyrmaǵa jýyq úmitker qatysýǵa tilek bildirip otyr. Oǵan Ermek Qazıev, Aıtjan Toqtaǵan, Orynbaı Dúısenov, Aıgúl Úlkenbaeva syndy óner maıtalmandary qazylyq etedi.
Sonymen qatar 19 qyrkúıek kúni H.Bókeeva atyndaǵy oblystyq qazaq drama teatrynda «Jahandaný álemi - Qurmanǵazy Saǵyrbaıulynyń máńgilik murasy» degen taqyrypta respýblıkalyq ǵylymı-tájirıbelik konferentsııa ótedi.
Munyń bári kúı atasy Qurmanǵazynyń baı murasyn nasıhattaý, ómiri men shyǵarmashylyǵyna qatysty derekterdi anyqtaı túsý, halyqty, ásirese, jetkinshek jastardy ulttyq mýzyka týyndylarymen sýsyndatý maqsatynda uıymdastyrylyp otyr.
