Qurmanǵazy shyǵarmalary kúı tilimen jazylǵan qazaq ómiriniń shejiresi - Mádenıet mınıstri
STANA. Mamyrdyń 24-i. QazAqparat /Marlan Jıembaı/ - Qurmanǵazynyń shyǵarmalary kúı tilimen jazylǵan qazaq ómiriniń shejiresi. Bul pikirdi búgin QR Mádenıet mınıstri Muhtar Qul-Muhammed Qurmanǵazy atyndaǵy VІІІ respýblıkalyq halyq aspaptarynda oryndaýshylar baıqaýynyń ashylý rásiminde bildirdi.
Mádenı shara barysynda sóz sóılegen Mádenıet mınıstri búgingi baıqaý elimizdegi eń qasterli, eń qadirli ári keńes zamanynan beri kele jatqan konkýrs ekendigin atap ótip, «Abaıdyń poezııasy - bul poezııa tilimen jazylǵan qazaq ómiriniń entsıklopedııasy bolatyn bolsa, Qurmanǵazynyń shyǵarmalary kúı tilimen jazylǵan qazaq ómiriniń shejiresi. Birde-bir qudiret dál Qurmanǵazynyń kúılerindeı ár qazaqtyń júreginiń tórinen oryn ala alǵan emes», dedi.
Qazaqstannyń batysynda da, shyǵysynda da, ońtústiginde de, soltústiginde de bolmasyn asyp-tógilip jatqan Qurmanǵazynyń asa baı murasy qaı qazaqtyń bolmasyn júreginiń kiltin tabatyndyǵyn aıtqan mınıstrdiń sózine qaraǵanda, álemge áıgili mýzykatanýshylar Qurmanǵazynyń shyǵarmalaryn óziniń qudirettiligi, tereńdigi, alýan mazmundylyǵy jóninen álemniń áıgili kompozıtorlary Bahtyń, Gaıdnnyń, Motsarttyń, Bethovenniń, Debıýsıdiń, Vagnerdiń shyǵarmalarynan esh kem emes dep baǵalaǵan. «Bul Ahmet Jubanovtyń monografııalarynda, zertteýlerinde jan-jaqty ashyp kórsetildi. Sondyqtan búgingi konkýrstyń Qurmanǵazynyń atynda bolýy bul qazaqtyń atyndaǵy konkýrs degen sózben para-par», deıdi M.Qul-Muhammed.
Onyń atap ótýinshe, qazirgi Qazaqstannyń kúı ónerin órge súırep júrgen nebir talanttardyń óner joldary elimizde osymen segizshi márte ótkizilgeli otyrǵan konkýrstyń laýreattyǵynan bastalǵan. Bul oraıda mınıstr baıqaýdyń laýreaty bolǵan Nurken Áshirovtiń Qazaqstanda teńdesi joq tamasha dombyrashylardyń qataryna qosylǵandyǵyn tilge tıek etti.
«Sondyqtan búgingi mynaý sahnaǵa shyǵyp otyrǵan jas muzbalaq qyrandarǵa, kók qaýyrsyndarǵa kúı aspanyna shyǵatyn bıikterdiń shyrqaý kókte bolsyn, saýsaqtaryńa Qurmanǵazy atalaryńnyń qudireti bitsin, qazaqtyń kúı ónerin qazaq mádenıetiniń tórinen álem mádenıetiniń tórine kóterýge at salysa berińder», degen mınıstr baıqaýǵa qatysýshylarǵa sát sapar tiledi.
