«Qurmanǵazy» operasy kontserttik qoıylym formatynda usynylmaq
ASTANA. QazAqparat - 19 qańtarda Astana qalasy ákimdiginiń Memlekettik akademııalyq fılarmonııasy Ahmet Jubanov pen Ǵazıza Jubanovanyń «Qurmanǵazy» atty kontserttik operasyn tartý etedi. Bul týraly elordanyń Mádenıet jáne sport basqarmasy málim etti, dep habarlaıdy QazAqparat.
«Qurmanǵazy» kontserttik operasynda oryndaıtyn partııalar: Qurmanǵazy - Qazaqstannyń eńbek sińirgen qaıratkeri Azamat Jyltyrkózov, Áýes - Shahrızada Tynyshtyq, Alqa - Qazaqstannyń eńbek sińirgen qaıratkeri Dına Hamzına, Perovskıı - Altynbek Ábildá, Aqbaı - Qazaqstannyń eńbek sińirgen qaıratkeri Qaıyrjan Berdibaı.
Sonymen qatar, atylmysh óner týyndysyna Kameralyq hor (kórkemdik jetekshisi Gúlmıra Quttybadamova), Sımfonııalyq orkestr (Bas dırıjeri Ernar Nurtazın), Estradalyq bı ansambli (kórkemdik jetekshisi Laýra Muqaeva) qatysady. Rejısseri - Ashat Qoshaev.
Kontsert «Rýhanı Jańǵyrý» baǵdarlamasynyń aıasynda tarıhı-mádenı murany saqtaý, damytý jáne dáripteý maqsatynda ótkiziledi. Premera «Astana» kontsert zalynda saǵat 18:00-de bastalady.
Qazaq mýzyka óneriniń gımalaıy, saz áleminiń sardary - Ahmet Qýanuly Jubanov, Qurmanǵazy Saǵyrbaıulynyń kúılerin orkestrge túsirip oryndatqan alǵashqy kompozıtor. 1951 jyldan bastap Ahmet Jubanov Qurmanǵazy týraly muraǵat derekterin jınaýǵa kirisedi. Qazaqstandaǵy muraǵattardan, Máskeý men Sankt-Peterbýrg qalalaryndaǵy kópshilik kitaphanalardan Qurmanǵazy týraly derekterdi taýyp, olardyń birqataryn baspasóz betterine jarııalaıdy. Keıin Qurmanǵazy jaıynda eńbek jazady. Onyń kóp jylǵy izdenisi, tolǵanysy «Qurmanǵazy» operasynyń jazylýyna jol ashady. Búginde atalmysh aýqymdy dúnıe ónerdiń zańǵaryna aınalyp otyr. Bul ómirsheń shyǵarmada kúıshi Qurmanǵazynyń aýyr taǵdyry, ómir belesteri, shyǵarmashylyq joly sýretteledi.
