Qurmanǵazy atyndaǵy orkestr Beıjińde kontsert beredi

Qazaq orkestri 5 jeltoqsanda «Álemdik mýzyka toptamasy» jobasy aıasynda óner kórsetedi. Kontserttik baǵdarlamada qazaq jáne sheteldik kompozıtorlardyń - Qurmanǵazy, Túrkesh, N.Tilendıev, Dáýletkereı, Abaı, Motsart, Bramsa jáne taǵy basqalardyń týyndylary kórermenge pash etilmek. Qazaqstan Respýblıkasynyń eńbek sińirgen qaıratkerleri Batyrjan Myqtybaev pen Farhat Kýbıev, halyqaralyq konkýrs laýreattary – Aızada Qaponova, Ardaq Itekeeva, Rýslan Baımuhatov jáne Ádil Erbolat óner kórsetedi.
UOÓO halyqaralyq yntymaqtastyq bóliminiń menedjeri Gao Jýısıýe «QazAqparat» HAA-ǵa bergen suhbatynda «Álemdik mýzyka toptamasy» jobasyn 2010 jyly Ulttyq oryndaý óneri ortalyǵynyń bastamashylyq etkenin habarlady. Onyń aıasynda 50 eldiń shyǵarmashylyq ujymynyń qatysýymen 120 kórinis qoıyldy.
Beıjińdegi Qurmanǵazy orkestriniń kontserti Qazaqstan Respýblıkasy Mádenıet jáne sport mınıstrligi men Qazaqstan Respýblıkasynyń Qytaıdaǵy elshiliginiń qoldaýymen ótedi.
Úlken ulttyq teatr dep atalatyn Ulttyq oryndaý óneri ortalyǵy Beıjińdegi Tıananmen alańyna jáne Halyq jınalysy úıine jaqyn derge ornalasqan. Teatrdyń úsh negizgi zalyna 6,5 myń kórermen syıady.
Avtory: Rýslan Súleımenov