Qurmanǵazy atyndaǵy orkestr «Astana keshteri» óner festıvalin ashady
ASTANA. QazAqparat - Qurmanǵazy atyndaǵy Qazaq memlekettik akademııalyq orkestri Astanada 20-22 maýsym aralyǵynda ótetin «Astana keshteri» atty ІІІ halyqaralyq óner festıvalin ashady. Bul týraly belgili pıanıst, festıval jetekshisi Tımýr Ýrmancheev búgin ótken brıfıngte málimdedi.
«Biz búgin festıvaldi bıyl 80 jyldyǵyn toılaǵaly otyrǵan keremet óner ujymy - Qurmanǵazy atyndaǵy orkestr ashqanyn durys dep sheshtik. Bul orkestrdiń barmaǵan eli joq shyǵar jáne olar ár saparynda bizdiń ulttyq ónerimizdi dáriptep keledi. Ujym Astanada únemi óner kórsetip júrse de, óziniń jeke kontsertin áli bermegen eken», - dep atap ótti T. Ýrmancheev.
Onyń aıtýynsha, festıval aıasyndaǵy kontsert orkestrmen shektelip qalmaıdy. Sondaı-aq, Shaba Ádenqulqyzy, Erlan Rysqalı, Aıgúl Qosanova syndy belgili oryndaýshylar da qatysady.
Aıta keteıik, festıval sheńberinde 5 kontsert ótkizý josparlanǵan. Olar «Astana-Opera» men Beıbitshilik jáne kelisim saraıynyń kontserttik zaldarynda ótedi. Kontsertte Qazaqstan, Reseı, Ázerbaıjan jáne Italııanyń ataqty ánshileri óner kórsetedi.
Festıval «Degdar» gýmanıtarlyq qorynyń qamqorlyq jónindegi tóraıymy Darıǵa Nazarbaevanyń uıymdastyrýymen jáne jetekshiligimen ótip otyr.
Uıymdastyrýshylardyń aıtýynsha, joba qaıyrymdylyq maqsatta ótetindikten, barlyq bıletter zal kassalarynda tegin taratylady. Kelemin deýshilerge esik ashyq.
