Qurmanǵazy atyndaǵy ІH Respýblıkalyq halyq aspaptarynda oryndaýshylardyń konkýrsy ótedi
ASTANA. 21 sáýir. QazAqparat - 23-26 sáýir aralyǵynda Astana qalasyndaǵy Qazaq Ulttyq Óner Ýnıversıtetiniń «Shabyt» ǵımaratynda qazaqtyń uly kúıshi-kompozıtory, qazaqtyń kúıshilik dástúriniń eń kórnekti tulǵasy, kúı atasy atanǵan Qurmanǵazy atyndaǵy ІH Respýblıkalyq halyq aspaptarynda oryndaýshylar konkýrsy ótedi.
Bul týraly Mádenıet jáne aqparat mınıstrliginiń baspasóz qyzmetinen habarlandy.
Asqan talant ıesi, qazaqtyń qaıtalanbas birtýar azamattarynyń biri Qurmanǵazynyń esimin jastar arasynda nasıhattap, onyń qaldyrǵan óshpes muralaryn jańǵyrtýǵa arnalǵan konkýrsty jyl saıyn uıymdastyrý dástúrge aınalǵan. Tuńǵysh ret Qurmanǵazy atyndaǵy Respýblıkalyq halyq aspaptarynda oryndaýshylar konkýrsy 1987 jyly Almaty qalasynda ótkizilgen bolatyn. 5-shi konkýrstan bastap is-shara Qazaqstannyń astanasy Astana qalasynda ótkizilip keledi.
Konkýrs úsh atalym boıynsha ótkiziledi: «Dombyra, sherter», «Qobyz, qyl-qobyz» jáne «Syrnaı» (baıan, akkordeon). Bıylǵy konkýrsqa qatysýǵa 16-32 jas aralyǵyndaǵy 45 ónerpaz ótinish bildirgen. Olardyń ishinde Aqtóbe, Atyraý, Semeı, Qaraǵandy, Almaty, Astana qalalarynyń shyǵarmashylyq ujymdary men mýzykalyq-oqý oryndarynyń ókilderi bar. Konkýrstyń saltanatty ashylýy - 23 sáýirde al, 26 sáýirde - Qazaq Ulttyq Óner Akademııasy «Shabyt» ǵımaratynyń úlken zalynda konkýrs jeńimpazdaryn marapattaý rásimi jáne Gala-kontsert ótetini josparlanǵan.
