Qurmanǵazy kúıleri álemdik mýzykalyq platformalarda jarııalandy
ASTANA. KAZINFORM — Qazaqtyń uly kúıshi-kompozıtory Qurmanǵazy Saǵyrbaıulynyń kúıleri álemdegi jetekshi mýzykalyq platformalarda jarııalandy.
Ulttyq dombyra kúnine oraı Kreatıvti ındýstrııalardy damytý qory janynan qurylǵan Qazaq Creative Production leıbli alǵashqy mýzykalyq relızin usyndy.
Qurmanǵazy Saǵyrbaıulynyń 10 kúıi jańa formatta qaıta jazylyp, bir albomǵa jınaqtaldy. Jınaq Spotify, Apple Music, ıAndeks Mýzyka jáne ózge de iri tsıfrlyq mýzykalyq platformalarda jarııalanyp, álemdik aýdıtorııaǵa qazaqtyń kúı ónerin keńinen tanytýǵa múmkindik beredi.
Atalǵan joba – ulttyq mýzykalyq murany tsıfrlyq keńistikte nasıhattaý men saqtaýǵa baǵyttalǵan mańyzdy bastama. Onyń basty maqsaty – qazaqtyń dástúrli mýzykasyn zamanaýı tehnologııalar arqyly keń aýdıtorııaǵa jetkizip, ulttyq mádenıettiń úzdik úlgilerin halyqaralyq deńgeıde dáripteý.
Kreatıvti ındýstrııalardy damytý qory janynan qurylǵan Qazaq Creative Production leıbli Qazaqstannyń mýzykalyq murasyn saqtaý jáne ilgeriletý baǵytynda jumys isteıdi. Alǵashqy mýzykalyq relız – ulttyq murany halyqaralyq tsıfrlyq keńistikke shyǵarýǵa baǵyttalǵan aýqymdy jumystyń bastaýy.
