Qurlyqtyq xokkeı lıgasy Qazaqstannan ekinshi klýbty qabyldaýǵa daıyn
ASTANA. QazAqparat - Búgin Astanada ótken baspasóz máslıxatynda Qurlyqtyq xokkeı lıgasynyń prezıdenti Dmıtrıı Chernyshenko lıganyń quramyna Almaty qalasynan taǵy bir klýbty qabyldaýǵa qatysty suraqqa jaýap berdi, dep xabarlaıdy QazAqparat tilshisi.
"Búgin biz Asqar Seıdaxmetulymen ("Barys" xokkeı klýbynyń prezıdenti - avt.) atalǵan máseleni talqylap, ózara pikir almastyq. Sóz joq, búginde Qazaqstan sporttyq derjavaǵa aınalyp keledi. Sizderdiń QHL deńgeıindegi ekinshi klýbty ustaýǵa múmkindigińiz de bar. Qazirgi kezde lıga Shyǵysqa qaraı keńeıip keledi. Ótken jyly bizdiń qatarymyzǵa qytaılyq "Kýnlýn" klýby qosyldy. Komanda debıýtant bolǵanyna qaramastan, bıyl pleı-offqa da shyqty. Ony bárińiz jaqsy bilesizder. Al Qazaqstanda daryndy xokkeıshiler kóp. Shyny kerek, qarjylyq jaǵdaıyńyz da ekinshi klýbty qurýǵa múmkindik berip otyr. Endi, bizdiń Shyǵysqa qaraı bet alǵanymyzdy eskersek, aldaǵy ýaqytta Qazaqstannyń atynan taǵy bir klýb shyǵýy ábden múmkin. Biz onyń bárin birlesip sheshetin bolamyz. Óıtkeni arnaıy protsedýra bar. Lıgaǵa ótinish berý kerek. Sol sebepti Almaty qalasy sondaı ótinishti joldap, kelissózderdi bastaı alady", - deıdi Chernyshenko.
Aıta keteıik, búginde Qurlyqtyq xokkeı lıgasynda Qazaqstannyń namysyn bir ǵana klýb qorǵap júr. Ol - Astana qalasynyń "Barys" xokkeı klýby. Al atalǵan lıgadan keıingi Joǵarǵy xokkeı lıgasynda Qaraǵandy qalasynyń "Saryarqasy" men Óskemenniń "Torpedosy" óner kórsetedi.
