Qurlyqtyq hokkeı lıgasy oıynynda «Barys» hokkeıshileri «Amýr» komandasyn utty
ASTANA. 13 qańtar. QazAqparat /Rýslan Ǵabbasov/ - Qurlyqtyq hokkeı lıgasy aıasyndaǵy keshegi oıynyn «Barys» hokkeıshileri Habarovsk qalasynda «Amýr» komandasymen ótkizip, jeńiske jetti.
Búgin, 13 qańtarda astanalyq hokkeıshiler atalǵan komandamen ekinshi oıynyn ótkizedi.
Syrt alańda ótken oıynnyń birinshi kezeńinde «Barys» hokkeıshisi Brendon Bochenskı esep ashty. Al ekinshi shaıbany Lýkash Kashpar salyp, esepti eseledi. Ekinshi kezeńniń 16-mınýtynda astanalyq komanda úshinshi shaıbany salý múmkindigin júzege asyrdy. Alaıda bul kezeńniń aıaqtalýyna 40 sekýnd qalǵanda «Amýrdyń» hokkeıshileri bir shaıba soqty. Sondaı-aq úshinshi kezeńniń 7-mınýtynda Habarovsk oıynshylary «Barys» qaqpasyna ekinshi shaıbany saldy. Arada 5 mınýt ótkennen keıin astanalyq Kevın Dallmenniń soqqan shaıbasy qarsylastardyń qaqpasynan tabyldy. Sóıtip 4:2 esebimen «Barys» oıyndy jeńispen aıaqtap, týrnır kestesinde bir satyǵa joǵarylady.
