Qurlyqtyq hokkeı lıgasy: «Barys» «Sıbırden» basym tústi
NUR-SULTAN. QazAqparat – Búgin astanalyq «Barys» Qurlyqtyq hokkeı lıgasyndaǵy kezekti oıynyn elordada Reseıdiń «Sıbır» (Novosibir) komandasymen ótkizdi, dep habarlaıdy QazAqparat tilshisi.
Eki komanda bıylǵy týrnırdi sátsiz bastady. Týrnır kestesinde sońǵy oryndardyń birinde keledi. Sondyqtan ekeýi úshin búgin jeńiske jetý mańyzdy bolatyn.
Oıynnyń alǵashqy kezeńinde komandalar bir-biriniń qaqpasynan sańylaý taba alǵan joq. Ekinshi kezeńniń 20-mınýtynda qazaqstandyq klýbtan Darren Dıts kózdegen nysanadan múlt ketpedi.
Odan keıin reseılik klýb tarazy basyn teńestirdi. Osylaısha, oıyn overtaımǵa ulasty.
Overtaımda qazaqstandyq klýbtan Kertıs Volk jeńis shaıbasyn soqty. Nátıjesinde elordalyq komanda 2:1 esebimen jeńiske jetti.
«Barys» 21 qyrkúıekte elordada Máskeýdiń TsSKA komandasyna overtaımda 1:2 esebimen jeńilip qalǵan edi.
Aıta keteıik, «Barys» bıyl budan burynǵy jeti kezdesýdiń nebári ekeýinde jeńiske jetti.
Endi «Barys» 27 qyrkúıekte elordada Reseıdiń «Avtomobılıst» (Ekaterınbýrg) komandasymen kezdesedi.
