Qurlyqtyq hokkeı lıgasy: «Barys» overtaımda «Avtomobılısten» basym tústi
NUR-SULTAN. QazAqparat - «Barys» búgin Qurlyqtyq hokkeı lıgasyndaǵy kezekti oıynyn elordada Reseıdiń «Avtomobılıst» (Ekaterınbýrg) komandasymen ótkizdi, dep habarlaıdy QazAqparat tilshisi.
Kezdesý asa tartysty ótti. Komandalar bir-biriniń qaqpasyna jıi shabýyldady. Nátıjesinde olar qaqpadan sańylaý tapty.
Birinshi kezeńde komandalar bir-bir shaıbadan almasty. Oıynnyń 2-mınýtynda «Barys» hokkeıshisi Darren Dıts mergendik tanytsa, 4-mınýtta reseılik komandadan Danıl Romantsev tarazy basyn teńestirdi.
Ekinshi kezeńniń 29-mınýtynda qazaqstandyq Egor Petýhov qaıtadan «Barysty» alǵa shyǵarsa, odan keıin «Avtomobılıst» sapynan Djessı Bleker 31, Georgıı Beloýsov 37-mınýttarda kózdegen nysanadan múlt ketken joq.
Úshinshi kezeńde bastalǵannan keıin qazaqstandyq komandadan Nıkıta Mıhaılıs 43, Djo Morroý 46-mınýttarda gol soqsa, 50-mınýtta reseılik Alekseı Makeev taǵy da tarazy basyn teńestirdi.
Negizgi kezeń 4:4 esebimen aıaqtalyp, oıyn overtaımǵa ulasty. Overtaımda jeńis shaıbasyn ıAkýb Lılıa soqty. Osylaısha «Barys» qarsylasynan 5:4 esebimen basym tústi.
Endi «Barys» 29 qyrkúıekte syrt aıdynda Reseıdiń «Metallýrg» (Magnıtogorsk) komandasymen kezdesedi.
«Barys» budan buryn elordada Reseıdiń «Sıbır» komandasyn overtaımda 2:1 esebimen basym túsken edi.
