Qurlyqtyq hokkeı lıgasy: «Barys» «Lokomotıvke» jol berdi
NUR-SULTAN. QazAqparat - «Barys» búgin Qurlyqtyq hokkeı lıgasyndaǵy kezekti oıynyn Reseıde «Lokomotıv» (ıAroslavl) komandasymen ótkizdi, dep habarlaıdy QazAqparat tilshisi.
Eki komanda tartysty oıyn ótkizdi. Bıylǵy týrnırdi sátsiz bastaǵandyqtan komandalar endi árbir kezdesýdde jeńiske jetýge tyrysyp keledi.
Oıyn barysynda qazaqstandyq komanda hokkeıshileri qatarynan eki shaıba soǵyp ketti. Ony Kertıs Valk 12, ıAkob Berglýnd 12 -mınýtta óziniń enshisine jazdy. Odan keıin «Lokomotıv» sapynan Aleksandr Polýnın 14, Pavel Kýdrıavtsev 18-mınýtta mergendik tanytyp, tarazy basyn teńestirdi.
Ekinshi kezeńde 35-mınýtta Darren Dıts gol soǵyp, taǵy da «Barysty» alǵa shyǵardy. Dese de araǵa mınýt salmastan reseılik Artýr Kaıýmov kózdegen nysanadan múlt ketken joq.
Úshinshi kezeńniń 52-mınýtynda Aleksandr Polýnın taǵy bir goldyń avtory atandy. Osylaısha «Barys» qarsylasyna 3:4 esebimen jol berdi.
Eske salsaq, budan buryn «Barys» Reseıde máskeýlik «Dınamodan» jeńilip qaldy.
Endi «Barys» 6 qazanda elordada Reseıdiń «Avangard» komandasyn qabyldaıdy.
