Qurlyqtyq hokkeı lıgasy: «Barys» qatarynan úshinshi márte jeńildi
NUR-SULTAN. QazAqparat - Elordalyq «Barys» Qurlyqtyq hokkeı lıgasyndaǵy kezekti oıynyn Reseıde «Vıtıaz» (Podolsk) klýbyna qarsy ótkizdi, dep habarlaıdy QazAqparat tilshisi.
Alǵashqy eki kezdesýinde qarsylastaryna ese jibergen «Barys» úshin jeńis aýadaı qajet bolatyn. Sondyqtan alǵashqy eki kezeń óte tartysty órbidi.
Oıynnyń 19-mınýtynda «Vıtıaz» hokkeıshisi Skott Ýılson esep ashty. Budan keıin qazaqstandyq klýb tarazy basyn teńestirýge umtyldy. Dese de tablodaǵy esep ózgerissiz qaldy.
Al 43-mınýtta reseılik komandadan Stepan Starkov esepti ulǵaıta tússe, odan keıin Vladıslav Kara 47, Jeremı Rýa 48, Kırııl Rasskazov 52-mınýttarda «Vıtıaz» komandasynyń basymdyǵyn arttyrdy.
Osylaısha «Barys» qarsylasyna 0:5 esebimen jol berdi.
Eki komanda buǵan deıin 30 márte kezdesti. Onyń 22-i «Barystyń» basymdyǵymen aıaqtalsa, qalǵanynda reseılik klýbtyń mereıi ústem boldy.
Aıta ketsek, endi elordalyq klýb 9 qyrkúıekte Reseıde «Sochımen» sheberlik baıqasady.
Al elordada 13 qyrkúıekte «Traktor» (Chelıabınsk) komandasyn qabyldaıdy.
Eske salsaq, «Barys» munyń aldynda alǵashqy kezdesýinde býllıtten mınskilik «Dınamoǵa» ese jiberdi.
Ekinshi kezdesýinde Reseıdiń SKA (Sankt-Peterbýrg) komandasyna jol berdi.
