Qurlyqtyq hokkeı lıgasy: «Barys» qatarynan tórtinshi márte jeńiske jetti
NUR-SULTAN. QazAqparat - Búgin astanalyq «Barys» Qurlyqtyq hokkeı lıgasyndaǵy kezekti oıynyn elordada Qytaıdyń «Kýnlýn Red Star» komandasyna qarsy ótkizdi, dep habarlaıdy QazAqparat tilshisi.
Kezdesýde alǵashqy mınýttarda qytaılyq hokkeıshiler sátti oıyn ótkizdi. Nátıjesinde olardyń qatarynan Aleks Rıch 17, Jýdı In 22, Mıhael Tam 25-mınýttarda mergendik tanytty.
Odan keıingi kezekte «Barys» sapynan Egor Petýhov 28, Roman Starchenko 31, Lınden Veı 33-mınýttarda gol soǵyp, tarazy basyn teńestirdi. Al ıAkob Lılıa 38, 44-mınýttarda eki goldyń avtory atanyp, elordalyq klýbty alǵa shyǵardy.
Budan keıin qytaılyq komandadan Itan Veren 48-mınýtta esep aıyrmasyn qysqartqan edi. «Barys» hokkeıshileri Kodı kýnık 49, Mett Frettın 51-mınýttarda kózdegen nysanadan múlt ketken joq.
Elordalyq klýb qarsylasynan 7:4 esebimen basym tústi. Osylaısha qatarynan tórt márte jeńiske jetti.
Qazir «Barys» 37 oıynnan keıin 36 upaımen týrnır kestesinde 18-orynnan 16-orynǵa kóterildi.
«Barys» endi kelesi oıynyn 12 jeltoqsanda elordada Reseıdiń «Neftehımık» (Nıjnekamsk) komandasyna qarsy ótkizedi.
Eske salsaq, budan buryn «Barys» elordada «Sochı» komandasyn jeńdi.
