Qurlyqtyq hokkeı lıgasy: «Barys» elordada «Neftehımıkten» jeńildi

ASTANA. QazAqparat - Elordalyq «Barys» Qurlyqtyq hokkeı lıgasyndaǵy kezekti oıynyn Astanada búgin Reseıdiń «Neftehımık» (Nıjnekamsk) klýbyna qarsy ótkizdi, dep habarlaıdy QazAqparat tilshisi.

Kezdesý barysynda reseılik komanda alǵashqy bolyp esep ashty. Oıynnyń 10-mınýtynda olardyń qatarynan Andreı Belozerov mergendik tanytty. Oǵan «Barys» hokkeıshisi Djeremı Brakko 17-mınýtta bir golmen jaýap qaıyrdy.

Ekinshi kezeńniń 36-mınýtynda Andreı Chıvılev qaıtadan «Neftehımık» komandasyn alǵa shyǵardy.

Úshinshi kezeńde elordalyq hokkeıshiler alǵa qaraı umtyldy. Olar tarazy basyn teńestirýge kúsh saldy. Alaıda degenine jete alǵan joq.

Osylaısha elordalyq klýb qarsylasyna 1:2 esebimen jol berdi.

Endi «Barys» aldaǵy oıynyn 6 qazanda Reseıde «Torpedo» (Nıjnıı Novgorod) komandasyna qarsy ótkizedi.

Eske salsaq, budan buryn «Barys» Astanada «Sochı» komandasynan basym tústi.