Qurlyqaralyq hokkeı lıgasy Qazaqstan quramasynyń olımpıadalyq irikteý týrnırine qatysýy úshin úzilis bermeıdi - A.Koreshkov
ASTANA. QazAqparat - Qurlyqaralyq hokkeı lıgasy Qazaqstan quramasynyń olımpıadalyq irikteý týrnırine qatysýy úshin úzilis bermeıdi. Búgin elordada ótken Qazaqstan hokkeı federatsııasy atqarýshy komıtetiniń qorytyndy otyrysy aıasynda BAQ ókilderine suhbat bergen el quramasynyń bas menedjeri Aleksandr Koreshkov osylaı dedi.
Aıta keterligi, «Barys» hokkeı komandasy Qurlyqaralyq hokkeı lıgasynda óner kórsetedi. Al komanda hokkeıshileriniń basym bóligi ulttyq quramamyzdyń sapynda oınaıtyndyǵy belgili. Bul rette QHL men olımpıadalyq irikteý týrnıri bir-birimen qabattasyp óteıin dep tur. Osyǵan oraı jýrnalıster bas menedjerden QHL «Barysqa» úzilis bere me dep suraǵan bolatyn.
«Joq, eshqandaı úzilis bolmaıdy. Qazirgi ýaqytta biz QHL-men barlyq oıyndardy úılestirý máselesin sheshýdemiz. Chempıonat 22 tamyzda bastalady. Sondyqtan biz QHL-dan eýropalyq ýaqytqa beıimdelý úshin birinshi matchty batysta ótkizýdi suraýdamyz. QHL keńesinen meniń túsinýimshe, Latvııaǵa, Belarýs pen Qazaqstanǵa úzilis berilmek emes. Sondyqtan biz qozǵalysymyzdy QHL oıyndarymen bastaımyz jáne tórt kún qalǵanda (olımpıadalyq irikteý týrnırine) Norvegııaǵa ushyp ketemiz», - dedi A.Koreshkov.
Esterińizge sala keteıik, olımpıadalyq irikteý týrnıri osy jyldyń 1-4 qyrkúıek kúnderi Osloda ótedi. Bul jarysta Qazaqstan quramasy jalǵyz olımpıadalyq joldama úshin Norvegııa, Frantsııa jáne Italııa quramalarymen kúsh synasady.
