Qurlyq áskerleriniń tárbıeshi ofıtserleri kásibı sheberlikterin shyńdaýda
Jıyn Jarkent garnızony áskerı bólimderi biriniń bazasynda bas qolbasshy bastyǵynyń orynbasary polkovnık Jumabek Hasenovtiń basshylyǵymen ótýde. Jıyn jumysyna Qazaqstan Qurlyq áskerleriniń barlyq bólimderinen 50-den astam ofıtser qatysýda.
Qazirgi ýaqytta Elbasy osy jyldyń qańtar aıynda qýatty qurylymdardyń basshylarymen bolǵan keńeste qoıǵan mindetterdi oryndaý aıasynda Qarýly Kúshterde tárbıe qurylymdary ofıtserleriniń mártebesi men jaýapkershiligin arttyrý jóninde eleýli sharalar qabyldanýda. Muny iske asyrý óz kezeginde komandırlerdiń tárbıe jáne áleýmettik-quqyqtyq jumystar jónindegi orynbasarlarynan kúndelikti tirshilik áreketiniń barlyq salalarynda bilikti bolýdy, joǵary kásibılik pen óz isine berilgendikti.talap etedi.
Jıynnyń negizgi maqsaty tárbıe qurylymdary ofıtserleriniń kásibı daıarlyǵyn jetildirý bolyp tabylady. Eń aldymen jıynǵa qatysýshylardyń aldynda bólimderdi jaýyngerlik ázirlikke keltirý kezinde jaýyngerlik daıarlyqty uıymdastyrý barysynda komandırler tárbıe jáne áleýmettik-quqyqtyq jumystar jónindegi orynbasarlary men olardyń baǵynystylary is-qımylynyń algorıtmin biryńǵaı túsinýge qol jetkizý mindeti tur.
Jıyn ótkizý kezinde negizinen sabaqtardyń praktıkalyq bóligine kóńil bólinetin bolady, sondyqtan kóptegen sabaqtar dalalyq jaǵdaıda josparlanǵan. Ofıtserlerdiń jeke daıarlyǵy da nazardan tys qalmaq emes: jıyn barysynda olar atys daıarlyǵy, dene jáne taktıkalyq-arnaıy daıarlyqtar boıynsha synaqtar tapsyratyn bolady.
Bólim komandırleri tárbıe jáne áleýmettik-quqyqtyq jumystar jónindegi orynbasarlarynyń beskúndik jıyny qysqy oqý kezeńindegi tárbıe qurylymdary qyzmetiniń qorytyndysyn shyǵarýmen aıaqtalady. Tárbıe jumystarynyń qorytyndysyn Bas shtab bastyǵynyń orynbasary - Qazaqstan Respýblıkasy Qarýly Kúshteri Tárbıe jáne ıdeologııalyq jumystar departamentiniń bastyǵy polkovnık Muhamedjan Talasov jarııalaıdy. Ol eseptik kezeńdegi úzdik tárbıeshi ofıtserlerdiń de esimin atamaq.