Qurlyq áskerleriniń eń myqty boksshysy anyqtalady (FOTO)
ASTANA. QazAqparat - 24-28 aqpan aralyǵynda Astana qalasynda «Jas ulan» mektebiniń sport kesheninde Qurlyq áskerleriniń bokstan ІІ ashyq chempıonaty ótip, munda ár salmaq dárejesindegi myqty sportshylar anyqtalady, dep habarlaıdy QR QM baspasóz qyzmeti.
«Ár áskerı qyzmetshi úshin boks - kúsh pen tózimdilikti jattyqtyrý ǵana emes, sonymen qatar minez-qulyqty, erikti shynyqtyryp, tabandylyq pen batyldyqty tárbıeleýdiń, eshteńege qaramastan jeńiske jetýge úırenýdiń joly bolyp tabylady», - deıdi QR QK Qurlyq áskerleriniń bas qolbasshysy general-leıtenant Murat Maıkeev.
Qurlyq áskerlerinde bul chempıonat ekinshi jyl qatarynan ótkizilip otyr. Bıyl chempıonatqa QR Qarýly Kúshteriniń barlyq túrleriniń, Shekara qyzmetiniń, Ulttyq ulannyń, Memlekettik kúzet qyzmetiniń áskerı qyzmetshileri qatysady.
Chempıonat qarsańynda óńirlik qolbasshylyqtarda, Qarýly Kúshter túrleri men ásker tekteriniń áskerı qyzmetshileri arasynda irikteý jarystary ótti. Osylardan oza shyqqan bilekti boksshylar ashyq chempıonatta eń myqty sportshy ataǵy úshin qolǵap túıistiretin bolady.
