Qurlyq áskerleriniń bas qolbasshysy áskerı bólimderdiń qysqa daıyndyǵyn tekserdi

ASTANA. 12 qarasha. QazAqparat - Qazaqstan Respýblıkasy Qarýly Kúshteri Qurlyq áskerleriniń bas qolbasshysy general-leıtenant Murat Maıkeev Semeı óńirlik garnızonynyń bólimderinde boldy, dep habarlady Qazaqstan Respýblıkasy Qorǵanys mınıstrliginiń baspasóz qyzmetinen.

Bas qolbasshy jumys saparynyń maqsaty áskerı bólimderdiń qysqy kezeńge daıyndyǵyn, sondaı-aq garnızon áskerı bólimderi áskerı tehnıkasy men qarý-jaraǵynyń saqtalý jáne paıdalaný jaǵdaılaryn, tehnıkany qysqy paıdalaný rejımine kóshirý nátıjelerin tekserý bolatyn. General-leıtenant áskerlerdi qysqy kezeńge tyńǵylyqty daıyndaý Qarýly Kúshterdiń úzdiksiz qyzmetin qamtamasyz etetinin atap kórsetti.

Áskerı bólimderde bolý barysynda general-leıtenant Murat Maıkeev jeke qurammen kezdesip, olardyń áleýmettik turmystyq jaǵdaılarymen tanysty, tehnıka men qarý-jaraqtyń jaı-kúıine, tehnıkalyq qyzmet kórsetý jáne jóndeý pýnktterine erekshe nazar aýdardy.

Sondaı-aq Qurlyq áskerleriniń bas qolbasshysy 16443 áskerı bóliminiń bazasynda ótkizilip jatqan «Shyǵys» óńirlik qolbasshylyǵy tyl qyzmetteri ofıtserleri men kelisimshart boıynsha áskerı qyzmetshileriniń jıynynda bolyp, oqý-jattyǵý oryndarynyń uıymdastyrylýyna oń baǵa berdi.

M. Maıkeev Semeı óńirlik garnızony áskerı bólimderiniń qysqy kezeńge jaqsy daıyndyǵyn atap ótti jáne «Shyǵys» óńirlik qolbasshylyǵy men áskerı bólim komandırleriniń aldyna kúndelikti qyzmettiń is-sharalaryn oryndaýǵa qatysty mindetter qoıyldy.