Qurlyq áskerleriniń áskerı ınstıtýtyna Saǵadat Nurmaǵambetovtiń esimi berildi

NUR-SULTAN. QazAqparat - 2020 jylǵy 11 qyrkúıektegi Úkimet qaýlysymen elimizdegi áskerı kadrlardy daıarlaıtyn biregeı bilim ordasy – Qurlyq áskerleriniń áskerı ınstıtýtyna armııa generaly Saǵadat Nurmaǵambetovtiń esimi berildi, dep habarlaıdy QazAqparat tilshisi QR Qorǵanys mınıstrliginiń baspasóz qyzmetine silteme jasap.

Saǵadat Qojahmetuly Nurmaǵambetov – Táýelsiz Qazaqstannyń Tuńǵysh Qorǵanys mınıstri, Keńes Odaǵynyń Batyry, eń alǵashqy Halyq Qaharmany. Ol Ekinshi Dúnıejúzilik soǵys jyldarynda dańqty jaýyngerlik jolyn Berlınde aıaqtaǵan. Keńes odaǵy kezinde M.I. Frýnze atyndaǵy Áskerı akademııany bitirgennen keıin ol túrli shtabtyq jáne komandalyq laýazymdarda, Vengrııadaǵy Ońtústik top áskerleri qolbasshysynyń birinshi orynbasary qyzmetterin atqardy. Táýelsiz Qazaqstan armııasynyń qalyptasýy men damýynyń aldyńǵy shebinde boldy.

Bıyl áskerı joǵary oqý orny jarty ǵasyrlyq mereıtoıyn atap ótti. Osy ýaqyt ishinde Qurlyq áskerleriniń Áskerı ınstıtýty 13 myńnan astam ofıtserdi daıarlap shyǵardy. Olardyń ishinde 80-nen astam túlek Qazaqstanda da, sondaı-aq shet memleketter de general shenin ıemdengen.