Qurlyq áskerleriniń Áskerı ınstıtýtyn 39-shy túlekter bitirip shyqty
ASTANA. 25 maýsym. QazAqparat. Búgin Qurlyq áskerleriniń Áskerı ınstıtýtyn 39-shy túlekter bitirip shyqty. Bir aılyq demalystan soń jas leıtenanttar Qarýly Kúshterdiń quramalary men bólimderina jol tartady,
dep habarlaıdy QR Qorǵanys mınıstrliginiń baspasóz qyzmeti.
Túlekterge dıplomdardy saltanatty túrde tabys etý is-sharalary áskerı oqý ornynyń qabyrǵasynda ótti. Oqý bitirýshiler bul jerden motoatqysh, tank, avtokólik, áýe desanty, ınjenerlik qyzmet mamandyqtaryn (barlyǵy 13 mamandyq) ıgerip shyqty.
Bıyl 300-den astam túlek oqý ornyn bitirgeni jóninde dıplom alyp otyr. Olardyń arasynda kórshiles Qyrǵyz Respýblıkasy men Tájikstan Respýblıkasynyń da ókilderi bar.
Qurlyq áskerleriniń Áskerı ınstıtýty tarıhynda bul jerde ár túrli mamandyq boıynsha 12 myńnan astam ofıtser daıyndalypty. Olardyń deni qazirgi tańda elimiz Qarýly Kúshteri men TMD armııalarynyń sapynda abyroıly qyzmet atqaryp júr.
Instıtýt UQShU-na múshe memleketter Qarýly Kúshteri úshin áskerı mamandardy birlesip daıyndaıtyn oqý oryndarynyń tizimine engizilgen. Oqý ornynyń kóptegen túlekteri irgeli áskerı bólimsheler men vedomstolardy basqaryp júr. Olardyń qatarynda joǵary áskerı ataqtar men memlekettik nagradalardyń ıegerleri de bar.
Jyl saıyn jas ofıtserlerdiń bitirý saltanatynda Jaýyngerlik týmen qoshtasý rásimi ótkiziledi. Bıyl bul mártebe oqý ozaty, «Áskerı oqý ornyn úzdik bitirgeni úshin» keýde belgisiniń ıegeri Almat Kaleevke buıyryp otyr. Oqý úlgeriminiń nátıjesi jas mamandarǵa bolashaq qyzmet ornyn tańdaýǵa múmkindik beredi. Endeshe, biz olardyń durys tańdaý jasaıtynyna senimdimiz.
- Jas leıtenanttar qandaı kóńil-kúımen jańa qyzmetterin bastaıdy eken?
Qýanyshpen, árıne, - deıdi Almat. - Erejege saı áskerı qyzmetshiniń balasy kýrsant bolýy zańdy qubylys, al ákege qarap ofıtser bolý úlken maqtanysh. Bul kúnge oqý kezinde barlyq aýyrtpalyqty kótere bilgender ǵana jetedi. Mine, leıtenant pogonyna laıyqtylar solar. Qazaqstan Respýblıkasyna qyzmet etemin!
