Qurlyq áskerleri - qazaqstandyq armııanyń basty jaýyngerlik kúshi - QR QK Qurlyq áskerleriniń bas qolbasshysy, general-leıtenant Murat Maıkeev
Búgin Qazaqstan Qarýly Kúshteriniń qurylǵanyna 20 jyl tolyp otyr. Osy ataýly kún qarsańynda eldiń aýmaqtyq tutastyǵy men egemendigin, shekarasyn, memlekettik jáne áskerı nysandaryn qarýmen kúzetetin QR QK Qurlyq áskerleriniń bas qolbasshysy, general-leıtenant Murat Maıkeevpen suhbattasýdyń sáti túsken edi. QazAqparat oqyrman nazaryna osy suhbatty usynady.
- Murat Jáleluly, Keńes Odaǵy ydyrap, Qazaqstan táýelsizdik alǵan jyldary armııamyzdyń qıyn-qystaý kezeńdi bastan ótkergendigin bilemiz. Al búginde tarıh úshin qasqaǵym sát sanalatyn 20 jylda zaman talabyna saı áskerimizdi qalyptastyrdyq dep aıtýǵa tolyq negiz bar. Osy rette Qarýly Kúshterimizdiń ósip-órkendeý jolyna bir nazar aýdarsańyz.
- Shyndyǵynda da egemen eldiń qalyptasýy asa kúrdeli geosaıası úderister aıasynda júrdi. Burynǵy KSRO-nyń ońtústik shekaralary turaqsyzdyq beldeýi retinde, tipti áskerı janjaldar shyǵýy yqtımal oshaqtar retinde sıpattalatyn. Aýǵanstandaǵy soǵys memlekettik shekaralar shepterinen attap ótip, anyq áskerı qaýipke aınaldy. Qyrǵyzstannyń Osh qalasynda ózbek pen qyrǵyz halyqtary ókilderiniń qandy qaqtyǵysy oryn alyp, nátıjesinde ondaǵan kinásiz adamdar qaza tapty. Kavkazda Ázirbaıjan men Armenııa arasynda soǵys boldy. Grýzııa shekaralary túbinde de soǵys órti tutandy. Mine osyndaı qıyn kezeńde memlekettik saıasattyń áskerı qaýipsizdikti qamtamasyz etý salasyndaǵy alǵashqy qadamdarynyń biri QR Prezıdentiniń 1991 jylǵy 25 qazanda shyqqan «Qazaq KSR-i Memlekettik qorǵanys komıtetin qurý týraly» Jarlyǵy boldy. Eki aıdan keıin, 16 jeltoqsanda QR-nyń memlekettik táýelsizdigi týraly Konstıtýtsııalyq zań qabyldanyp, ol «Qazaqstan Respýblıkasy óziniń táýelsizdigi men aýmaqtyq tutastyǵyn kúzetý maqsatynda óz Qarýly Kúshterin qurýǵa quqyly» dep anyqtady. Aıta keterligi, osy kezeńderde ótken Qaýipsizdik keńesi jaǵdaıdy jan-jaqty jáne tereń zerdelegennen keıin respýblıkada ornalasqan bólimder men quramalardy, birin qaldyrmastan, túgel Qazaqstan Prezıdentiniń baqylaýyna alý qajet degen qorytyndyǵa keldi. Osylaısha óziniń derbes Armııasyn qurýǵa zańdy quqyǵyn QR 1992 jylǵy 7 mamyrda el Prezıdentiniń «Qazaqstan Respýblıkasynyń Qarýly Kúshterin qurý týraly» Jarlyǵy shyǵýymen iske asyrdy.
Qarýly Kúshter qurylysynyń bastapqy kezeńindegi asa mańyzdy problema egemen el Armııasynyń normatıvtik-quqyqtyq negizin qurý boldy. 1993 jylǵy aqpanda QR-nyń birinshi Áskerı doktrınasy qabyldandy. Onda Qazaqstannyń, eger onyń ózi nemese odaqtastary qarýly agressııa obektisine aınalmasa, qandaı da bir memleketke qarsy áskerı is-qımyldardy eshqashan, eshqandaı jaǵdaıda da birinshi bolyp bastamaıtyndyǵy kórsetildi. Ony bylaı qoıǵanda, doktrınada bizdiń Respýblıkanyń eshkimge qaýip tóndirmeıtindigi, barlyq memlekettermen qarym-qatynasty qaýipsizdik múddesin ózara eskerý negizinde qurýǵa ázir ekendigi, áskerı ústemdikke de umtylmaıtyndyǵy atap kórsetildi. Odan keıingi jyldarda Ulttyq qaýipsizdik strategııasy 2000 jylǵy 10 aqpanda bekitilgen ekinshi Áskerı doktrınanyń bazısine aınaldy. Naq sol kezde alǵash ret Qarýly Kúshterdi eldiń jalpy ishki óniminiń keminde 1 paıyz kóleminde kepildi baǵdarlamalyq-maqsatty qarjylandyryp otyrý ustanymy normatıvtik túrde bekitildi. Jańa doktrına Qarýly Kúshterdi qurý men reformalaýdyń: qurylymdy ońtaılandyrý; Utqyr kúshterdi basymdylyqpen damytý; basqarý júıesin jetildirý, áskerı-aýmaqtyq qurylymǵa aýysý; rezervti daıarlaý júıesin jasaý; áskerı bilim berý jáne áskerı kadrlardy daıarlaý júıesin jetildirý, áskerı-ǵylymı bazany qurý jáne damytý; áskerı qyzmet mártebesin kóterý; áskerı-qyzmettik qarym-qatynastardy adamgershildendirý sekildi basty baǵyttaryn aıqyndady. 2007 jylǵy kelesi Áskerı doktrınada memlekettiń áskerı uıymyn damytýdyń negizgi baǵyttarynyń biri óńirlik qolbasshylyqtar áskerleriniń belgilengen jaýaptylyq aımaqtarynda áskerı qaýipsizdik mindetterin sheshý máselelerindegi naqty derbestigin qamtamasyz etý jáne áskerlerdiń strategııalyq baǵyttardaǵy jetkilikti toptastyqtaryn qurý bolyp aıqyndaldy.
- Jańa memlekettiń jańa Armııasynyń normatıvtik-quqyqtyq bazasyn jasaýmen bir ýaqytta ulttyq Qarýly Kúshterdiń beınesi men qurylymyn, olardyń basqarý organdaryn qalyptastyrýda tynymsyz jumys júrgizilgendigi belgili. Atalǵan jumystardyń qalaı júrgizilgenin tarqata aıtyp berseńiz.
- 1991 jyldyń sońyna taman Qazaqstan aýmaǵynda KSRO Qarýly Kúshteri áskerleriniń jalpy sany shamamen 200 myń adamdyq toptastyǵy boldy. Kadr máselesin sheshý qıyndady. Túrli ultty áskerı qyzmetshilerdiń óz elderine belsendi ketýi kezeńinde Qazaqstan áskerı mamandardyń jetkiliksiz mólsherimen qaldy. Óz armııamyzdy quryp jatqan asa jaýapty kezeńde Qazaqstanda qyzmette júrgen kóptegen ofıtserler qyzmet ótkerýdi TMD-nyń basqa memleketterinde jalǵastyrýǵa nemese zapasqa shyǵýǵa sheshim qabyldady. Eki jarym jyl ishinde, 1992 jylǵy mamyrdan 1995 jylǵy qańtarǵa deıin ofıtserlerdiń ketýi eń joǵarǵy deńgeıge - tizimdik quramnyń 89 paıyzyna jetti. Qazaqstannyń jas armııasy kadr jetispeýshiligin bastan keshirip jatty. 1993 jyldyń sońyna taman negizgi quramalar men bólimderdiń ofıtserlermen jasaqtalýy 50-60 paıyz shamasynda bolsa, keıbir polkter 40, al Georgıevtegi motoatqyshtar polki tek 27 paıyz ǵana jasaqtaldy. Úsharal gvardııalyq motoatqyshtar polkinen 1992-1995 jyldar aralyǵynda komandır, shtab bastyǵy, komandırdiń qarý-jaraq, tárbıe jáne áleýmettik jumystar jónindegi orynbasarlary; kıim-keshek, azyq-túlik, janar-jaǵar maı materıaldary, radıatsııalyq, hımııalyq jáne bakterıologııalyq qorǵaý qyzmetteriniń bastyqtary ketip qaldy. Almaty motoatqyshtar polkiniń batalondarynda birde-bir shtab bastyǵy, birde-bir batalon komandıriniń orynbasary bolǵan joq. Polk qyzmetteri bastyqtarynyń laýazymdary jáne tank rotalary komandırleriniń laýazymdary bos turdy. Tek Qorǵanys mınıstrliginiń jedel jáne utymdy sharalarynyń, jas Armııany qurýda tynymsyz eńbek etken generaldar men ofıtserlerdiń, olardyń kúrdeli sheshim qabyldaı bilýiniń arqasynda ǵana bizge jaǵdaıdy ońdap jáne Qarýly Kúshterdi saqtap qana qoımaı, ári qaraı qaryshtap damýǵa platsdarm jasaý múmkindigi týdy.
- Jalpy osy Qazaqstan Qarýly kúshteri quramyndaǵy qurlyq áskerleriniń paıyzdyq úlesi qandaı?
- Álemdik tájirıbe kórsetkendeı, qarýly kúshterdiń basqa túrleriniń qarqyndy damýyna qaramastan, Qurlyq áskerleri, burynǵysynsha, basym túrde qalyp otyr jáne álemniń jetekshi armııalarynyń negizin quraıdy. Mysaly, bul kórsetkish AQSh-ta - 46, Ulybrıtanııada - 48, Germanııada - 69, Qytaıda - 70 paıyz. QR Qarýly Kúshteriniń quramynda, onyń bir túri retinde, tıisti mindettemeleri men ókilettikteri bar Qurlyq áskerleri bolý kerek degen túsinik alǵash ret 1996 jyly keldi. Sóıtip, 19 shildede Qorǵanys mınıstriniń QR QK Qurlyq áskerleriniń basqarmasyn qurý týraly Dırektıvasy shyqty.
Shyndyq úshin aıtý kerek, osyndaı túrdegi, atalǵan mindetteri men ókilettikteri bar Qurlyq áskerleriniń basqarmasy uzaq ómir súrgen joq. Jańa geosaıası aqıqattarǵa sáıkes áskerı basqarý júıesin tutas vertıkal boıymen: memlekettikten áskerler deńgeıine deıin qaıta qurý qajettigi týdy. Basqarý júıesiniń aıtarlyqtaı ózgeristeri basqarýdyń mynadaı úsh túrin qarastyrdy: - áskerı-saıası - bul Qorǵanys mınıstrliginiń halyqaralyq aýqymdaǵy áskerı jáne saıası máselelerdi sheshýge qabiletti departamentteri men basqarmalary; - strategııalyq - Qarýly Kúshterdi jaýyngerlik qoldanýdy josparlaýǵa, olarǵa áskerı janjaldarda is júzinde basshylyq jasaýǵa arnalǵan. Ony Bas shtab pen onyń quramyna kiretin departamentter men basqarmalar; jedel - Qarýly Kúshter túrleri qolbasshylarynyń basshylyǵymen toptastyqtardyń operatsııalar daıyndaýy men júrgizýin beıbit ýaqytta josparlaý. Al endi suraǵyńyzǵa jaýap berer bolsa, Qarýly Kúshterdiń búkil jeke quramynyń ishindegi qurlyq áskerleri jaýyngerleriniń úlesi: ofıtserlerde - 36, kelisimshart boıynsha áskerı qyzmetshilerde - 54, merzimdi qyzmet sarbazdarynda - 82 paıyzdy quraıdy. Alaıda, sany aıtarlyqtaı kóp bolǵan jáne eń zamanaýı qarýmen jaraqtalǵan jaǵdaıdyń ózinde de olar óz maqsatyn tek qarýly kúrestiń qazirgi zamanǵy tásilderin meńgergende, jeke quramnyń joǵary moraldyq-jaýyngerlik qasıetteri, jaýyngerlik tehnıka men qarý-jaraqtyń jaýyngerlik múmkindikterin paıdalana bilý daǵdylary bolǵanda ǵana oryndaı alady. Qarýdy bilýge, ony paıdalanýdyń turaqty daǵdylaryna, áskerı qyzmetshilerdiń, bólimshelerdiń, bólimder men quramalardyń jaýyngerlik jaǵdaıdaǵy tyǵyz ózara is-qımylyna tek jaýyngerlik daıarlyqpen ǵana jetýge bolady.
- Qazaqstan halyqaralyq áskerı áriptestikti jolǵa qoıyp, birqatar bitimgershilik is-sharalaryna da qatysty ǵoı.
- Iá, Qarýly Kúshter basshylyǵy olar qurylǵan kúnnen bastap halyqaralyq áskerı áriptestikke, basqa elder armııalarymen ózara is-qımylǵa jáne tájirıbe almasýǵa kóp kóńil bóldi. TMD memleketterimen áriptestikke Ujymdyq qaýipsizdik týraly shart, sondaı-aq qorǵanys sıpatyndaǵy jekelegen máseleler boıynsha ekijaqty kelisimder negiz boldy. Bul rette, tıisti kelisimderge qol qoıylmaı turyp-aq, tek memleket basshylarynyń sheshimderi negizinde naqty birlesken sharalardy qabyldaýǵa ómirdiń ózi májbúr etip otyrdy. Sóıtip, 1993 jylǵy maýsymda Tájikstanǵa onyń Aýǵanstanmen shekarasyn kúzetýge kómek kórsetý úshin Qazaqstannyń jeke qurama atqyshtar batalony quryldy. Bastapqyda batalon quramyna Qurlyq áskerleriniń eki rotasy, Shekara áskerleriniń eki rotasy jáne ІІM Іshki áskerleriniń bir rotasy kirgen bolatyn. Pıandj ózeniniń boıyndaǵy Qalaı-Hýmb kentinen Horog qalasyna deıingi shekaranyń 100-den asa shaqyrym jeri qazaqstandyqtar kúzetýine berildi. Іri shaıqastardyń biri 1994 jyly kúzde Horogqa jaqyn jerde boldy, onda 200 sodyrdan turatyn banda talqandaldy. Ókinishke oraı, qaqtyǵystardyń bári birdeı tabysty aıaqtalǵan joq. 1995 jylǵy 7 sáýirde rotalardyń biriniń avtolegi Pshıhrov shatqalynda tosqaýylǵa ushyrady. Urysta 17 sarbaz ben serjant qaza boldy. Qazaqstandyq batalon osy ýaqyt ishinde barlyǵy 300 shekara buzýshyny ustady jáne shekaralyq ózennen ótýdiń 30 toptyq áreketine toıtarys berdi, 60 adamynan aıryldy.
Qazaqstandyq bólimshelerdi BUU-nyń qamqorlyǵymen bitimgershilik isterge tartýdyń alǵashqy tájirıbesi 1995 jylǵy 15 jeltoqsanda Qazaqstan, Qyrǵyzstan jáne Ózbekstan prezıdentteri qurǵan Ortaazııalyq bitimgershilik batalony boldy. Keıin kele, bitimgerlik operatsııalarǵa qatystyrý úshin Qapshaǵaıda «Qazbat» qazaqstandyq bitimgerlik batalony quryldy. Bul bitimger quralym bizdiń eldiń halyqaralyq beıbitshilik pen qaýipsizdikti saqtaýdaǵy mindettemelerin oryndaýǵa arnaldy. «Qazbat» jaýyngerleri 2003 jáne 2008 jyldar aralyǵynda Iraktaǵy Kópultty halyqaralyq ujymdyq qaýipsizdik kúshteri quramynda bitimgershilik mıssııa oryndaý kezinde jaýyngerlik mindetterin abyroımen atqaryp shyqty. Bizdiń áskerı qyzmetshilerge jarylmaı qalǵan oq-dárilerdi izdestirý men joıý, dalalyq sýmen jabdyqtaý pýnktterin jaraqtaý, sýdy tazalaý jáne jergilikti turǵyndarǵa medıtsınalyq kómek kórsetý tapsyrylǵan bolatyn. Osy ýaqyt ishinde 4 mln asa qaýpi bar zattar joıyldy, Irak qaýipsizdik kúshteri úshin jarylý qaýpi bar zattardy joıý jónindegi 488 maman men áskerı súzgish stantsııanyń 10 eseptoby daıarlandy, 7 myńnan astam ırak azamatyna medıtsınalyq kómek kórsetildi. Ókinishke oraı, qazasyz da bolmaı qalǵan joq - jaýyngerlik tapsyrma oryndaý kezinde kapıtan Qaırat Qudabaev qaza tapty.
Osy oraıda aıta keterligi, áskerlerdiń jaýyngerlik jáne jumyldyrý daıarlyǵyn uıymdastyrý máselelerin sheshpeı turyp, qazaqstandyq armııanyń Qurlyq áskerlerin qurý múmkin emes edi. Armııanyń alǵash qurylǵan jyldarynda-aq Qarýly Kúshterdiń Joǵarǵy Bas qolbasshysy N.Á. Nazarbaev, eń aldymen, quramalar, bólimder jáne bólimsheler komandalyq quramynyń generaldary jáne ofıtserleriniń jaýyngerlik is-qımyldar júrgizýdegi praktıkalyq daǵdylardy meńgerýine qol jetkizýdi, olardyń boıyna qazirgi zamanǵy jalpyáskerı urysty júrgizýge qajetti taktıkalyq oı-óristi sińirýdi talap etti. Osy maqsatta áskerı oqý-jattyǵýlar belsendi ázirlenip, ótkizile bastady. Olarda oqý-jattyǵýlardy ótkizý ádistemesi jetkizilip, basshylyq býyndarynyń is-qımyldaryndaǵy kemshilikterge jan-jaqty taldaý júrgizildi. Basshy qurammen, quramalar jáne bólimder komandırlerimen jaýyngerlik daıarlyq boıynsha kórsetý sabaqtary, Qurlyq áskerleriniń avıatsııamen ózara árekettestiktegi jaýyngerlik is-qımyldary pysyqtalatyn oqý-jattyǵýlar ótkizildi. Sońǵy jyldardaǵy jergilikti soǵystar men áskerı janjaldar tájirıbesi áskerlerdiń kez kelgen ahýalda jáne aıqyn belgilengen maıdan shebi bolmaıtyn ári jaýyngerlik is-qımyldar jergilikti jerdiń naqty obektilerin basyp alyp, ustap turýǵa emes, qarsylas toptastyqtaryn talqandaýǵa, onyń oq atý quraldaryn janshýǵa, manevr jasaý erkindiginen aıyrýǵa, áskerler men kommýnıkatsııalardy basqarý quraldaryn bólip tastaýǵa baǵyttalatyn jaǵdaılarda da soǵysa bilýge tıis ekendigin úıretti.
- Murat Jáleluly, áńgimeniń aýanyn áskerimizdiń qurylý tarıhyna qaıta bir márte buryp, jalpy osy kezeńdegi Armııamyzdyń materıaldyq-tehnıkalyq qamtamasyz etilý máselesi tóńireginde sóz qozǵasaq.
- Birden aıtaıyn, áskerı qurylys tájirıbesi Qarýly Kúshterdi qurýdyń asa mańyzdy elementteriniń birin qamtamasyz etýdiń barlyq túrleriniń jáne eń aldymen, materıaldyq-tehnıkalyq qamtamasyz etýdiń jetildirilýi, óz qorǵanystyq-ónerkásiptik kesheniniń damýy bolyp tabylatyndyǵyn kórsetti. Memlekettiń qalyptasýynyń qıyn jyldarynda armııanyń obektıvti negizde jetkiliksiz qarjylandyrylýy qarý-jaraq pen jaýyngerlik tehnıka jaı-kúıiniń nasharlaýyna ákelip soqtyrdy. Qarý-jaraq pen áskerı tehnıkanyń paıdalanylýy men saqtalýy qaýipti deńgeıge jetti. 90-shy jyldar basynda jaýyngerlik tehnıka men qarý-jaraqtyń kóptegen tehnıkalyq aqaýlary boldy. Qosalqy bólshektermen jaraqtalmaý 60-70 paıyzǵa jetti, akkýmýlıator batareıalarynyń paıdalaný merzimderi ótip ketti. Jóndeý zaýyttary TMD aýmaǵynda qalǵandyqtan, dereý óz qorǵanys ónerkásibi keshenin qurý jáne damytý qajet boldy. Qarý-jaraq pen tehnıkanyń tehnıkalyq jaı-kúıiniń nasharlaýyna qarý-jaraq pen tehnıkaǵa qyzmet kórsetý men jóndeý jónindegi daıyndalǵan kishi mamandardyń bolmaýy da sebep boldy. Jóndeý bólimsheleriniń jóndeý jumystaryn sapaly oryndaýǵa, qarý-jaraq pen tehnıkany aqaýsyz kúıde ustaýǵa shamasy jetpedi. Bul - bylaı qaraǵanda sheshilmeıtindeı kóringen qarama-qaıshylyqtar men problemalarǵa toly kúrdeli jol edi. Tek, Memleket basshysynyń el qorǵaýshylaryna jasaǵan kúndelikti qamqorlyǵynyń, Joǵarǵy Bas qolbasshynyń komandalyq quramǵa udaıy talap qoıǵandyǵynyń arqasynda ǵana qazir Qarýly Kúshterde qamtamasyz etýdiń barlyq túrleriniń úzdiksiz júıesi qalyptastyryldy. Jyldan-jylǵa oqý-materıaldyq baza jetildirilip, qarý-jaraq pen áskerı tehnıkanyń eń jańasyn satyp alý jáne qoldaǵy baryn túpkilikti jańǵyrtý júrgizilýde, qyzmet fýnktsııalarynyń bir bóligi básekeles ortaǵa berildi, bul áskerı qyzmetshilerdi olarǵa tán emes fýnktsııalardy atqarýdan bosatýǵa múmkindik jasady. Memleketimizdiń basshysy Nursultan Ábishuly Nazarbaevtyń maqsatshyl eńbeginiń arqasynda elde turaqty ekonomıkalyq damý tabysty júzege asýda, beıbitshilik pen saıası turaqtylyq, azamattardyń teń quqyqtylyǵy men ultaralyq kelisim saqtalýda. Qol jetken tabystar Qazaqstan azamattarynyń turmysyn jaqsartý, ekonomıkany jańǵyrtý, qazirgi zamanǵy azamattyq qoǵamdy qalyptastyrý turǵysynda odan ári júıeli qadamdar jasaý úshin ornyqty negiz boldy dep senimdi túrde aıtýǵa bolady. Búginde Qurlyq áskerleriniń quramynda tórt óńirlik qolbasshylyq áskerleri, Aeroutqyr áskerler, Raketa áskerleri men artıllerııa, arnaıy áskerler, sondaı-aq tyldyq jáne tehnıkalyq qamtamasyz etý quramalary men bólimderi, medıtsınalyq mekemeler bar.
- Búgin egemendik alyp, etek-jeńin qymtaǵan elimizdiń aıbarly Qarýly Kúshteriniń 20 jyldyǵy. Osy júrip ótken 20 jyldy qalaı baǵalaısyz?
- Qazaqstan Qarýly Kúshteriniń 20 jyldyǵy - bul qazaqstandyq armııanyń qalyptasý jáne damý kezeńderin saralaýǵa, keıbir qorytyndylardy jasap, bolashaqtyń mindetterin naqtylaýǵa múmkindik beretin mańyzdy shep. Osy jyldar ishinde syrtqy saıasat pen áskerı qurylys salasynda el basshylyǵy júzege asyrǵan sharalar kesheni memlekettiń áskerı qaýipsizdigin onyń egemendiginiń qalyptasý kezeńinde tek qamtamasyz etip qana qoımaı, búkil álemdik qaýymdastyqtyń moıyndaýy men qoldaýyna ıe bolýǵa múmkindik jasady.
Qazaqstan Respýblıkasynyń Qarýly Kúshterin qurý men damytýdyń kúrdeli jáne kóp qyrly úderisin tolyq saralaý tarıhshylar enshisinde. Eń mańyzdysy - jańa egemen memlekettiń jas armııasy óziniń alǵashqy kúnderinen bastap-aq Elbasynyń dana basshylyǵynyń arqasynda bárin: ofıtserlik quramnyń jappaı ketýin, qarý-jaraq pen áskerı tehnıkanyń jańa túrlerimen jaraqtaýdyń bolmaýyn, ınfraqurylym obektileriniń buzylýyn, áskerı qyzmet mártebesiniń eń tómengi deńgeıge deıin quldyraýyn, jasaqtaýdaǵy, jaýyngerlik jáne jumyldyrý daıarlyǵynyń, áskerlerdi jan-jaqty qamtamasyz etýdegi problemalardy jeńip shyǵa aldy. Bar-joǵy 20 jyldyń ishinde burynǵy keńestik keńistiktegi eń jaýyngerlik qabiletti Qarýly Kúshterdiń biri quryldy. Áskerı qyzmetshiler turmysynyń úzdiksiz jaqsartylýy armııadaǵy qyzmettiń qadiri men bedelin arttyrdy. Qazaqstan Respýblıkasynyń Qarýly Kúshteri Elbasynyń turaqty kóńil bólýiniń, onyń dana da kóregen saıasatynyń arqasynda múmkin bolǵan aqıqat fakt ekendigin búginde kúlli álem moıyndap otyr.
- Ýaqytyńyzdy bólip suhbat bergenińizge rahmet! Qazaqstan Qarýly Kúshteri qatarynda atqaryp jatqan qyzmetińiz jemisti bolsyn! Oraı kelip turǵan sátti paıdalanyp, búgingi merekege oraı qarýlastaryńyzǵa degen aq nıetińizdi bildirseńiz.
- Merekelerińiz qutty bolsyn, jaýynger dostar! Bizdiń Otanymyz - Qazaqstan Respýblıkasynyń ıgiligi úshin etken mártebeli jaýyngerlik eńbegimizde jańa tabystarǵa qol jetkize bereıik! Qarýly Kúshterdiń Joǵarǵy Bas qolbasshysynyń basshylyǵyndaǵy qazaqstandyq armııany erlik ister kezegi kútýde!